KOTA SAMARAHAN: Pekara ti diperambu perintah besai Pakatan Harapan (PH) ke meri pemanah ngagai Sarawak nyengkaum pekara dalam Wawasan Kemakmuran Bersatu (WKB) 2030 ti mungkur nengeri tu, patut disukung.
Menteri Dagang Temuai, Seni enggau Main Asal, Datuk Abdul Karim Rahman Hamzah madahka taja pan dua perintah tauka parti ke enda sama tang nyema pekara ke diperambu nya meri pemanah tauka penguntung ngagai pemansang nengeri, nadai kebuah enda disukung.
Apin lama Menteri Pekara Ekonomi Datuk Seri Mohamed Azmin Ali lebuh ti mantaika perambu perintah PH nengah WKB 2030 deka ngenukuka bagi kandang endur ekonomi di Sarawak sereta sektor ti diperambuka nyengkaym eko-dagang temuai.
“Aku deka nyukung enda ngira bagi pekara ti meri pemanah ngagai Sarawak, aku mega pechaya rayat Sarawak mega nyukung.
“Enti Azmin ulih ngelala bagi hotspot nya enggau madahka bagi, lalu nyema dagang temuai dini endur di sarawak ti deka dikelaluka sida.
“Enti nya pekara ti manah, nama kebuah enda, kitai patut nyukung, anang semina ketegal kitai parti ti enda sama tauka perintah ti enda sama, semua utai ke diperambu PH ditulak,” ku iya lebuh dikerandau raban pemberita.
Dulu ari nya Abdul Karim ti mega Menteri Nembiak enggau Lumba enggau Main bejadika Drama Festival Kuala Lumpur (DFKL) Versi Sarawak 2019 ti diatur ba Panggung Eksperimen Fakulti Sains Gunaan dan Kreatif, Universiti Malaysia Sarawak (UNIMAS) ditu, kemari.
Azmin ba Dewan Rakyat madah enggau ngelala bagi hotspot ekonomi, perintah deka nentuka pemansang ekonomi ukai semina numpu ba sekeda endur aja tang dikerembaika ngagai dua menua nitihka pengelebih enggau penyelai.
Ba Sarawak, kelimpah ari eko-dagang temuai, sektor ke deka ditumpuka nyengkaum tenaga boleh diperbaharui, betanam betupi beteknologi tinggi, ekonomi komoditi enggau produk hiliran.
Nitihku Azim taja pana perintah besai udah ngelala bagi sektor ti ditumpu ba Sarawak enggau Sabah, tang pekara nya mega agi begunaka penemu ari kededua nengeri laban semina nengeri tu ke nemu nama potensi ke bisi.
Kelimpah ari nya lebuh ti ngenang isu ke dibantaika Pakar Undang-Undang Kosntitusyen Prof Datuk Dr Shad Saleem Faruqi apin lama, ti madah Sarawak enda ulih netapka chukai jual produk petroleum, Abdul Karim madahka diri enda setuju enggau penemu nya.
“Enti ditugungka 10 iku luya ba siti bilik lalu diasuh bejakuka sesebengkah pekara, nuan deka bisi 10 poin ti bebida.
“Nya penemu Shad Saleem Faraqi empu ti madah chukai jual produk petroleum nya hak perintah besai, perintah nengeri nadai kuasa nya.
“Ari penemu aku empu, aku enda setuju enggau iya (Shad Saleem Faruqi),” ku iya.
Abdul KArim madahka bisi sekeda pekara ti engka enda ditemu Shad Saleem Faruqi enti iya enda mansik silik lebih agi bekaul enggau chukai.
Enti semina meda ba mua aja engka kitai madah amat, ku iya.
“Iya nyembut Akta Pembangunan Petroleum (PDA), enti (iya) mansik silik pasal chukai nya, Sarawak bisi hak penuh netapka chukai jual produk petroleum hiliran, bisi pasal pekara nya enggau iya engka ngenggaika pekara tu,” ku iya.