SIBU: Sebuah ‘one stop centre’ udah dilanggur ba ditu dikena mutarka isu ke ditapi orang ke nadai palan pengentap pendiau.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah madah pelin deka nukar palan ke engkeman di Begunan MAKSAK nyadi palan diau sementara ngagai sida ke nadai palan pengentap pendiau nya ngidupka diri.
Nitihka iya, langgur nya dikenataika Residen Sibu Charles Siaw deka dipansik silik agi enggau penumbuh Anjung Singgah ti begunaka ungkus belanja.
“Empat palan tu iya nya di Kuching, Sibu, Bintulu enggau Miri ke mayuh agi orang ti nadai palan pengentap pendiau dibanding enggau palan bukai di Sarawak. Ari keempat kandang menua nya, semina Kuching bisi Anjung Singgah.
“Nya alai, kami benung berunding deka ngengkahka sida (orang ke nadai palan pengentap pendiau). Bisi pematut ungkup palan bukai dikena numbuhka Anjung Singgah di Sibu, Miri enggau Bintulu, tang begunaka ungkus belanja besai.
“Ketegal nya, kami andal enti bisi Gerempung Ukai Dikuasa Perintah (NGO) nyaup kitai ngaga ‘one stop centre’ tu lalu tuan Residen udah meri perambu ke manah.
“Aku mikir tu idea manah laban konsep bebida mimit ari Anjung Singgah lalu kami nyukung sebarang chara laban nya ulih meri pemaik ngagai komuniti Sibu,” ku iya nerang.
Fatimah madah munyi nya lebuh dikerandau pemberita pengudah ngulu program matau orang ke nadai palan pengentap pendiau ngelingi mengeri Sibu bedau lama ti udah.
Sama bisi datai iya nya Residen Bagi Menua Sibu Charles Siaw enggau Sapit Direktor Opis Pengelantang Pendiau (JKM) Nengeri Sarawak Mohamad Ali.
Bisi 60 iku pengari ejensi nyereta pengawa tu baka JKM Nengeri Sarawak, Opis Residen Sibu, Opis Pelilih Menua Sibu, Opis Kaunsil Mengeri Sibu (SDC) sereta polis.
Enti langgur nya nyadi nyata, Siew madah langkar projek nya udah tembu.
Nitihka SRDC, nya deka begunaka masa enam bulan dikena ngubah lalu sebulan bejalaika pengawa ngatur nya.
Entara konsep nya, Siew madah agih pemakai deka diberi pagi enggau malam lalu palan ngengkah kerita diguna ungkup nuchi kerita ngambi ulih nyungkak penatai pemisi.
Taja pia, iya madah agi bisi pekara ke patut dipejalaika nyengkaum ngiga NGO ke bekaul enggau meri agih belanja pejalai pengawa nya.
Sentang langgur pengawa nuchi kerita, ba penemu Fatimah, palan nya engkeman laban nya ba mengeri besai.
“Sida ke nadai palan pengentap pendiau enggau nadai gawa ulih dilatih ngatur pengawa ba palan nuchi kerita lalu ulih ngiga penatai pemisi.
“Enti sida bisi kereja, tu ulih ngangkatka tikas pengidup sida. Kami deka sida nadai penanggul lalu ulih ngidupka diri,” ku iya.