Anda di sini

Ngembuan mayuh penemu nentuka tiap individu ulih ngidupka diri

Advertisement
Dr Penguang nyain poster pengerami apresiasyen SMK Riam lalu dikemataka Alwi, Normah enggau Mariam (kanan) di Eastwood kemari.
NYAIN POSTER:Dr Penguang nyain poster pengerami apresiasyen SMK Riam lalu dikemataka Alwi, Normah enggau Mariam (kanan) di Eastwood kemari.

MIRI: Ngembuan penemu ti mayuh nentuka siku individu nya ulih ngidupka diri ba sebarang alai sereta ulih ngaga pekara ke pemadu manah dalam nama pan bidang ke diambi.

Menteri Muda Kaunsil Kandang Menua enggau Pengawa Berumah Datu Dr Penguang Manggil madah, penemu nya kuasa, reta enggau pengaya ke beguna amat dalam pengidup mensia.

“Nyema nuan ngembuan penau bepikir sereta analitikal lalu bisi penemu ke mayuh nyengkaum peneleba dalam pengidup, aku pechaya dini pan alai sida ngengkah nuan, nuan ulih tan. Ukai tan aja tang ulih ngaga pekara ke pemadu manah,” ku iya ngelalau nembiak sekula Pom 5 Sekula Sekondari (SMK) Riam Taman Tunku ba pengerami apresiasyen ungkup sida di Eastwood Valley Golf and Country Club kemari.

Kaban Kunsil Nengeri (ADUN) Marudi nya madah, nyema udah mujur enggau nyadi orang ke beguna ba komuniti, sida dipinta anang enda ingat ke menua asal diri sereta ajar ari pengajar enggau apai indai.

Nuju apai indai, sida enda patut meda pemerinsa pengidup nyadi penanggul dalam bejalaika tanggungpengawa meri pelajar ngagai bala anak.

Kerejasama ngagai sekula enggau pengajar nengah Gerempung Apai Indai enggau Pengajar (PIBG) beguna amat dikena ngangkatka tikas pelajar nembiak dalam bidang akademik enggau kokurikulum.

Penguang madah, pelajar nya pekara ke amat dikemerat di konstituensyen Marudi ke diatu bisi 28 buah sekula.

Lebih RM5 juta ari geran Projek Mit Menua Pesisir (MRP) enggau Program Transformasyen Menua Pesisir (RTP) diungkup ba pengawa ngangkatmanah sekula nyengkaum ngaga balai mayuhguna, perengkaguna sekula sereta bantu insentif.

Bedau lama ti udah, iya udah meri bantu RM12,000 dikena ngatur pengerami ba SMK Marudi.

Ungkup SMK Riam, sepenyampau RM10,000 geran MRP deka diberi dikena bejalaika aktiviti sekula nya.

Iya temegah enggau tikas penyulut sekula nengah peniki Gred Purata Sekolah (GPS) dalam timpuh tiga taun tu.

Kelimpah ari nya, iya temegah laban sekula nya udah netapka Petunjuk Prestasi Utama (KPI) ba GPS SPM taun baru ila iya nya 4.34.

“Tu siti perambu ke patut digaga kitai ba dini-dini institusyen. Nya kebuah, enti kitai bisi visyen tauka juluk ati ba pekara ke digaga kitai, KPI aku nya deka nyadi lutur, KPI aku nya deka nyadi injinir, luyar enggau ke bukai, aku pikir enti kitai bebendar belajar, kitai ulih nyapai visyen tauka tagit ke udah ditetapka,” ku iya nerang.

Sema enda mujur, nembiak patut meda nya ari sukut pengepun pejalai nyapai penyulut ke baru.

Bisi 170 iku nembiak ke napi peresa SPM diintu ba pengerami nya ti manggai siri ke 10 ke diatur sekula nya.

Sama bisi datai iya nya Penyelia Pelajaran PPD Miri, Mariam Monek, Chairman PIBG Alwi Mustapha enggau Proncipal Normah Abdul Latiff.

Advertisement