KUCHING: Sapit Kepala Menteri, Datuk Amar Douglas Uggah Embas ngelalau raban bansa ngambika berubat enggau lengkas ba Klinik Rabies ti semak nyema diketup tauka dikeramak ukui, mayau tauka kera.
Atur ti mudah tu ku iya deka nyelamat nyawa kelebih agi diatu Sarawak betapi enggau pengelekai penyakit rabies.
Jaku lalau tu ditandu Uggah berindik ari siti agi kes ti nabanka nyawa orang ke-21ketegal rabies naka ke diatu.
Uggah dalam penerang iya kemari madah, penerang diterima ari Opis Verterinar Nengeri di Mukah, orang nya siku lelaki, 64, diketup ukui kena 21 Mei taun tu.
“Ripot nya madahka iya diketup maya meri ukui nya makai.
“Taja pan iya dilalau ngambika berubat tang iya enggai sereta madahka nya enda balat.
“Lalu kena 6 Ogos iya diperubat ba Sepital Bintulu sereta udah nadai kena 19 Ogos ba Unit Intu Siru,” ku iya.
Uggah ti mega Chairman Komiti Mutarka Penusah Ngenyit Nengeri bejaku baru madah, bisi kes sebedau tu ke alai orang ke diketup nya ulih digeraika pengudah terus diperubat maya kena ketup.
“Kitai bisi fasiliti dikena ngubat. Nya alai lalau aku uji seliahka ari diketup ukui lalu enti deka ngambi lalu ngempu ukui tentuka dulu kita nemu dini asal iya sekalika udah dituchuk vaksin sereta kemaya.
“Nyema bedau dituchuk vaksin, anjung jampat betuchuk,” lalau iya.
Ku iya, taja pan mayuh jaku lalau dikenataika nengah surat kabar, radio, media sosial tang mensia mayuh agi napi penanggul tu sereta nabanka nyawa laban enda mendingka jaku lalau.
Nitihku Uggah, rikod Opis Menteri Pengerai mandangka kes ketup ukui enggau mayau di Sarawak agi tinggi ba puku rata 40 ngagai 60 kes tninting hari.