MIRI: Pengawa numbuhka dua Palan Belajar Komuniti (CLC) di Miri udah ngayanka perintah Sarawak endang komited dalam nyendiaka pelajar ukai semina ungkup komuniti di kandang menua tu aja, tang mega ungkup nembiak ari menua luar.
Menteri Pengelantang Pendiau, Komunti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madahka CLC udah ditumbuhka kenyau ari bulan Ogos 2015.
“Kitai nemu pelajar tu iya nya endang hak pemun siku nembiak mit. Pelajar CLC tu ditumbuhka dikena meri pelajar pemun ngagai anak kitai tu nyentukka sida nyapai umur 12 taun ke pengudah nya lalu nyambung pelajar ba luar Sarawak,” ku iya dalam siti penerang berita kemari.
Fatimah madahka, perintah Sarawak udah besetuju ngemendarka penumbuh CLC ungkup pemaik bala anak pekereja ladang penatai asal ari Indonesia di Sarawak, nitihka garis lalau ke udah ditetapka Opis Menteri Pelajar Malaysia.
“CLC iya nya dikena nentuka bala anak pengereja pengawa ari Indonesia ti diau ba Malaysia enda tinggal dalam bidang pelajar lalu ulih nitihka pengawa belajar ti bepelasarka kurikulum Indonesia sepengudah sida pulai ke menua asal sida,” ku iya.
Nyadika rikod ku iya, bisi 63 buah CLC di selampur Sarawak enggau 114 iku pengajar lalu bisi 1,870 nembiak mit ti belajar dia ti mungkur umur 7 nyentuk 12 taun.
Dulu agi ari nya, iya udah nyadi ketuai dalam pengawa nemuai ngagai dua buah CLC ti bepalan ba Ladang Lambir, Sarawak Oil Plantation Berhad (SOPB) lalu sebuah agi ba Ladang Tiga, Sarawak Plantation Berhad (SPB), Miri.
Ku iya, sebuah woksyop enggau program berandau udah diatur dikena ngadaka garis lalau sereta proses ngerejister CLC di Sarawak ba taun 2016.
“Tu iya nya dikena nentuka atur sereta garis lalau nya dititih lalu entara nya palan CLC meseti digaga ba endur ti likun enggau kondusif.
“Kelimpah ari nya, bala pengajar mega datai ari bala pengajar ti endang udah nerima latih lalu udah dipeda dulu ari sukut pengelikun, tikas pelajar degree enggau pengelandik sereta setipikit ti engkeman ari Indonesia,” ku iya.
Berebak enggau nya, perintah Indonesia udah ngambi inisiatif dalam numbuhka CLC enggau kerejasama kompeni ladang.
Pengawa manah CLC tu iya nya dikena ngadaka akses ngagai pelajar ti bekualiti lalu bisi karakter ungkup semua anak Pengereja Pengawa Migran Indonesia (BMI) di Sarawak.
Iya ke mega Kaban Kunsil Nengeri (ADUN) Dalat nya muji pengawa manah CLC Ladang Tiga, Miri ti nyendiaka perengka pengangkut bas dikena mai bala nembiak ti besekula dia ari rumah ke CLC lalu nganjung peulai baru ke rumah sida empu.
Tu nyadi servis ke pemadu beguna ngambika nembiak ulih besekula lalu enda tinggal dalam pelajar.
Iya mega ngarapka CLC ke bukai ulih nyadika nya chunto baka ti digaga CLC Ladang Tiga laban ba polisi keterubah penumbuh CLC iya nya tnggungpengawa sama bela dikunsi ari raban pengatur ladang enggau raban ti ngarika pekereja migran ari ladang nya.