MIRI: Ketuai komunti enggau raban bansa (KMKK) di kandang menua Marudi enggau Beluru ngenggaika pengawa numbuhka Majlis Pengurusan Komuniti Kampung (MPKK) di Sarawak.
Pemancha Enggah Muga ti ngarika KMKK di kandang menua nya madahka sistem Komit Pemansang enggau Pengelikun Genturung Pendiau (JKKK) ti endang udah bisi tu agi meruan megai tanggungpengawa enggau manah dalam pengawa ngatur genturung pendiau tauka rumah panjai di Sarawak.
“Pia mega nengah sistem JKKK tu nya mega diatur sereta dikemata enggau manah ari Opis Pelilih sida empu nyengkaum rumah panjai tauka genturung pendiau ti bisi kurang ari 20 pintu bilik.
“Nya alai ba kami, pengawa numbuhka MPKK tu endang enda patut, lalu nya semina dipeda deka ngeruga hak Sarawak kelebih agi dalam pengawa ngatur enggau ngintu rumah panjai tauka genturung pendiau,” ku iya nyemetak maya aum media ti digaga ditu lemai kemari.
Sama bisi datai iya nya pengari ari ketuai komuniti Iban, Melayu enggau China di kandang menua Marudi enggau Beluru.
Nitih ku Enggah, pengawa nyiri ketuai raban bansa nyengkaum Tuai Rumah, Ketuai Genturung Pendiau tauka Kapitan digaga nengah Prosedur Operasyen Standard (SOP) ti udah ditentuka perintah nengeri.
Ku iya, ketuai raban bansa ti dipilih mega dichiri nyadi chairman JKKK sebuah rumah panjai tauka genturung pendiau enggau automatik dikena nentuka pengelanchar pengawa ngatur lalu dikena nyeliahka enda sebaka penemu dalam proses ngatur rumah panjai tauka genturung pendiau.
“Pengawa nyiri chairman JKKK ukai nya dichiri nengah chara politik nitih ti dikerembai diatu.
“Tang pengawa numbuhka MPKK nya ila udah tentu deka ngujungka komuniti rumah panjai tauka genturung pendiau pambar lalu tu deka ngeruga agi laban ti bisi raban ke nyukung parti penyakal tauka ke enda dipilih nyadi ketuai raban bansa udah tentu andal deka numbuhka MPKK di rumah panjai tauka genturung pendiau sida.
“Pengawa numbuhka MPKK tu deka ngujungka pemisi dua iku ketuai dalam sebuah rumah panjai tauka genturung pendiau ti deka besibil enggau tanggungpengawa chairman JKKK,” ku iya nyemetak.
Iya mega nawa, Pakatan Harapan (PH) bedau bekuasa tang udah berengkah deka ngachau tauka ngeruga hak komuniti ditu ungkup pemaik politik kediri.
“Kami enggaika komuniti pambar lalu nyadi enda terenah laban pekara politik PH.
“Kami tetap enggau penemu kami ti deka ngetanka penyerakup enggau pemanah rama komuniti di Sarawak ti datai ari pupu raban bansa enggau jalai pengarap,” ku iya nambah.
Dulu agi ari nya, KMKK nya udah datai ngulu Program Berandau Begulai enggau Menteri Muda Kaunsil Kandang Menua ti mega Kaban Kunsil Nengeri (ADUN) Marudi Datu Dr Penguang Manggil ba hotel Dynasty kemari.
Beserimbai enggau nya, Penguang madahka pengawa numbuhka MPKK nya enda ulih diterima lalu nya dikena bala ketuai PH di Sarawak laban dikena mai ungkup tuju politik sida empu.
Pai mega, Penguang udah madah iya nya pengawa numbuhka MPKK nya enda ulih diterima lalu nya deka digaga ketuai PH di Sarawak ketegal tuju ke pemaik politik diri empu.
“Pengawa numbuhka MPKK tu deka ngujungka penyarut. Enggau pengawa numbuhka MPKK tu ila, nya deka meri empas ngagai rumah panjai, genturung pendiau tauka rayat di Sarawak ti endang udah lama idup dalam penyerakup.
“Indah ke semaya sebedau tu bedau dikeamatari sida PH, tu mega lalu deka besemaya numbuhka MPKK,” ku iya.