Anda di sini

Kemeratka kualiti nyendiaka pemakai, ai irup ungkup PSP

Advertisement

KUCHING: Mimbar Permuafakatan Ibu Bapa Malaysia (MAPIM) Sarawak ngansak pemekal Program Sarapan Percuma (PSP) ti diperambu berengkah taun baru, ngemeratka kualiti nyendiaka pemakai enggau ai irup ba ikas ti pemadu manah.

Yang DiPertua MAPIM Sarawak Omar Immun madah, laban bepelasarka dua mekanisme operasyen baka dipadahka Menteri Pelajar Malaysia Dr Maszlee Malik, ukai mudah pemekal nyadung pemakai dalam timpuh bisi tatak seraya sereta beratka kualiti enggau nyendiaka pemakai enggau ai irup.

“MAPIM Sarawak ngarapka semua pengawa ti dipejalaika dikena ngemujurka PSP tu ulih nyapai pemutus enggau pemujur ti pemadu manah baka ti dirintai ba tuju enggau objektif nya dipejalaika.

“Pengawa nyendiaka pemakai enggau ai irup ngena dua mekanisme baka ti dipinta Dr Maszlee (Menteri Pelajar) tu amat begunaka komitmen tinggi dikena nyeliahka ari mayuh penanggul bukai nyadi,” ku iya ti bisi peneleba nyendiaka pemakai ngagai nembiak ba sekolah Sukan Bukit Jalil enggau Institut Victoria suba.

Omar ti mega nyadi Ketuai Pemadah MAPIM Kebangsaan ngarapka program ke deka dipejalaika tu ila deka seruran dikemanahka kelebih agi bekaul enggau jam nembiak makai tauka ngirup pagi ti ditusun berenggat enggau palan ke dikena.

PSP amat beguna ngagai semua nembiak dipelabaka 2.7 juta nembiak serata menua sereta MAPIM ngarapka apai indai ngambi awak tu ngelalau anak awakka nguna manah program ke deka dipejalaika, ke pemanah sida, ku iya.

“Timbal ti kala diterima kami ari apai indai ke kurang penatai pemisi, sida amat berasai gaga sereta nyambut manah PSP tu ke ulih ngelempungka pemerat enggau mantu anak sida ba sekula.

“MAPIM Sarawak beterima kasih ngagai Opis Menteri Pelajar Malaysia ba pemanah program tu sereta kami besampikaPSP tu diatur enggau mujur,” ku iya lebuh ditanya Utusan Borneo bekaul enggau isu tu.

Bepelasarka riput Bernama di Kuala Lumpur ensanus, Menteri Pelajar Dr Maszlee Malik madahka program nya deka ngena dua mekanisme.  

Program nya ti diperambu berengkah dipejalaika taun baru dipelabaka ulih meri penguntung ngagai urung 2.7 juta iku nembiak sekula Primari di serata menua.

“Mekanisme keterubah iya nya bejalaika operasyen PSP pengelama 30 minit ngena champur batang menu baka pemakai ke dipanduk enggau menu buah.

“Mekanisme kedua iya nya bejalaika operasyen PSP pengelama 10 minit nguna champur menu ai irup produk tenusu baka ai irup ti manahka pengerai enggau menu pemakai lempung bekonsepka sedia diempa baka roti, biskut, snek bijirin, kuih enggau telu rebus,” ku iya ba sesi tanya saut aum Dewan Rakyat.

Maszlee mega madahka jam meri ngirup pagi iya nya sebedau pukul 8.30 pagi ungkup nembiak sesi pagi enggau sebedau pukul 4 lemai ungkup nembiak sesi lemai sereta ditusun berenggat nitihka penengkeman sekula.

“Maya makai tauka ngirup nya deka ditusun berenggat enggau palan endur nembiak makai deka mayuh alai baka ngena endur tauka bilik ke bisi ba sekula diri empu.

  • oleh
  • Advertisement