KUCHING: Seraban 32 iku sekretari politik kepala menteri udah ngangkat sumpah ensanus, ke alai servis sida ditampung ngagai 15 bulan lalu ukai 12 bulan baka ke ngelama tu.
Timpuh servis nya berengkah ari 1 Oktober nyentuk ke 31 Disember taun baru.
Ba rebak tu bisi 31 iku ke baru dichiri , lalu pengari tunggal ari Parti Sarawak Bersatu (PSB) ba rebak ke sebedau tu enda dipilih lalu pangku pengawa nya diatudiberi ngagai pengari ari parti komponen Gabungan Parti Sarawak (GPS).
Semina siku aja orang baru ke dirintai iya kaban kaunsil besai Parti Progresif Demokratik (PDP) Brian Fung, 59, dikena nyilih Suzanne Lee ari PSB ti semina setaun aja nyadi sekretari politik kepala menteri.
Reti nya, ungkup ke pangku pengawa nya diatu diberi ngagai Parti Pesaka Bumiputera Bersatu (PBB) 19 iku, Parti Sa’Ati Rakyat Sarawak (SUPP) lima iku, Parti Rakyat Sarawak (PRS) lima iku lalu tiga iku ungkup PDP.
Orang ke dichiri baru ari PBB iya nya Abu Seman Jahwie, Kenil Jaraie, Faridah Osman, Buang Bolhassan, Sharkawi Suhaili, Julani Mokhtar, Victor Temenggung Angang, Romeo Christopher Tegong, Maurice Joannes Giri, Petrus Igat Mathias, Dr Richard Rapu, Charles Balan Seling, Michael Mujah Lihan, Tapah Ata, Abdul Samad Gany, Jenny Bangga, Susan Chemerai Anding, Dayang Nurfizawati Abang Abdul Karim enggau Dr Simon Sinang Bada.
Ari PRS ke dichiri baru iya nya Datuk Seri Doris Sophia Brodie, Nicholas Kudi Jantai, Edwin Banta, Charles Chad Nissom and Beatrice Kedoh Tajang, lalu ari SUPP ke dichiri baru iya nya Teng Ung Woo, Daniel Bujal, Tan Kai, Michael Tiang enggau Soo Li Ching.
Ke dichiri baru ari PDP iya nya Alexander Asing Sadai enggau Robert Ayu.
Sida besumpah sebedau Sapit Kepala Menteri Datuk Amar Douglas Uggah Embas ti ngarika Kepala Menteri Datuk Amar Abang Johari Tun Openg datai ba pengawa nya ke diatur ba Wisma Bapa Malaysia.
Fung lebuh ke dirandau pengudah pengawa nya madah, pengudah iya dichiri, reti nya PDP diatu bisi tiga iku sekretari politik kepala menteri.
“Sebedau tu kami patut bisi empat, tang dikurangka,lalu diatu bisi tiga,” ku iya.
Iya meri terima kasih ngagai Kepala Menteri laban udah nyiri iya nyadi siku ari sekretari politik lalu iya mega meri terima kasih ngagai presiden PDP Datuk Seri Tiong King Sing laban udah nganjung nama iya ngambika mangku pengawa nya.
Berebak enggau nya, Fung besemaya deka gawa bebendar negapka perintah GPS kelebih agi napi Pakatan Harapan (PH) ba pengawa bepilih nengeri ti deka datai.
“Baka ke ditemu kita, PH amat bebendar deka nyatup kitai diatu. Semua sekretari politik mesti gawa bebendar nentuka perintah GPS kering belama,” ku iya.
Sama bisi ngulu pengawa nya Speaker Kunsil Nengeri Sarawak Datuk Amar Mohd Asfia Awang Nassar, Menteri Muda Undang- Undang enggau Adat Bumiputera Datuk John Sikie Tayai, Menteri Muda Kaunsil Kandang Men ua enggau Pengawa Berumah Datu Dr Penguang Manggil, Menteri Muda Dagang Temuai, Seni enggau Main Asal Datuk Sebastian Ting, Menteri Muda Perengka Pengangkut Datuk Dr Jerip Susil enggau bala ketuai ti dipebasa ke bukai.