SIBU: Bisi 19 iku orang ti nadai palan pengentap pendiau udah ditemu dalam program matau raban nya di mengeri Sibu malam kilah ensana.
Operasyen nya ti betuaika Menteri Pengelantang Pendiau, Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah.
Program nya ti disereta Residen Bagi Menua Sibu Charles Siaw enggau Sapit Direktor Opis Pengelantang Pendiau Komuniti (JKM) Nengeri Sarawak Mohamad Ali.
Bisi 60 iku raban ari ejensi ti bekaul iya nya JKM Nengeri Sarawak, Opis Residen Sibu, Opis Pelilih Sibu, Opis Kaunsil Mengeri Sibu (SDC) sereta polis.
Ari 19 iku orang ti nadai palan pengentap pendiau nya, 15 iku lelaki lalu empat iku orang indu ti bisi 12 iku sida ke beumur 60 taun ke atas, lima ti beumur 36 nyentuk 59 taun lalu dua iku ti beumur 18 nyentuk 35 taun.
Enti ari tusun nitihka etnik, bisi tujuh iku ari bansa China, Iban (enam), orang menua luar (tiga), Orang Ulu (dua) lalu Melayu (seiku).
Kandang menua ti nyadi palan endur sida tu ngenduh ba kandang mengeri Sibu iya nya Rajang Esplanade (Jalai Maju/ Palan Penyangkai Feri), Pasar Sentral Sibu (Jalai Channel), Dataran Tuanku Bujang Fasa I/ Jalai Sanyan/ Jalai Tukang Besi/ Jalai Market (Pasar Malam), Jalai WOng Nai Siong sereta Pintu Gerbang Sibu.
Entara isu ti ditapi sida ke nadai palan pengentap pendiau tu iya nya mabuk, dibuai diri sebilik, ngiga pengawa, nadai palan endur ngentapka diri sereta penyakit mental.
Sebedau berengkah operasyen nya, Fatimah madah ngagai pemberita iya nya kenyau ari 2016, bisi 83 bengkah operasyen ti dipejalai di selampur nengeri dikena nyaup bala ti nadai palan pengentap pendiau tu.
Ari operasyen nya, iya udah madahka bisi 195 iku sida tu udah mujur diselamatka entara taun 2016 nyntukka 2019 enggau majoriti ti beumur 50 nyentuk 59 taun lalu ditangkan sida ti beumur 40 nyentuk 49 taun.
Fatimah ke mega Kaban Kunsil Nengeri (ADUN) Dalat madahka program matau tu iya nya siti ari pengawa dikena mutarka isu tu lalu ngadaka penerang data bekaul sida ti nadai palan pengentap pendiau di Sarawak.
“Asil ari program tu, opis menteri deka ngadaka penerang data ti nyadi ‘evidenced-based input’ dikena mutarka isu orang ti nadai palan pengentap pendiau enggau efisyen agi di Sarawak,” ku iya.
Bekaul program matau nya, Fatimah madah tu mega nangkan ke program matau ti udah dipejalai kena Jun taun tu tadi.