Anda di sini

Perintah Sarawak enda setuju enggau penemu Dr Shad

 Hasidah lebuh dikerandau raban pengarang berita bekaul enggau penerang dipansutka Shad Saleem Faruqi seraya disempulang Penyanding Penemu Undang-Undang Nengeri Sarawak Dato Sri JC Fong, kemari. — Gambar Chimon Upon
NIMBAL: Hasidah lebuh dikerandau raban pengarang berita bekaul enggau penerang dipansutka Shad Saleem Faruqi seraya disempulang Penyanding Penemu Undang-Undang Nengeri Sarawak Dato Sri JC Fong, kemari. — Gambar Chimon Upon

KUCHING: Perintah Sarawak enda setuju enggau penemu pakar undang-undang konstitusyen Prof Datuk Dr Shad Saleem Faruqi ti madah nengeri tu enda tau bejalaika chukai nyual ba produk petroleum.

Menteri Muda ba Opis Kepala Menteri (Undang-Undang, Kaul Perintah Nengei-Besai enggau Pematau Projek) Sharifah Hasidah Sayeed Aman Ghazali madah, perintah nengeri bisi penemu enggau interpretasyen ke diri empu pasal pekara nya.

“Ba kitai perintah nengeri Sarawak, kitai enda setuju enggau penemu ke dipansutka Prof Saleem Faruqi.

“Kitai bisi penemu enggau interpretasyen ke diri empu pasal konstitusyen,” ku iya seraya madahka siti penerang deka dipansutka perintah nengeri bekaul enggau pekara nya.

Hasidah dikerandau raban pengarang berita pengudah ti ngulu pengawa nyain sempekat pemereti ati (MoU) entara Amalgamated Batteries Manufacturing (Sarawak) Sdn Bhd enggau Jujiang Power Technology Co. LTD. (China) ba sebuah hotel ditu, kemari.

Ditanya baru sekalika penerang ke dipansutka Saleem Faruki nya deka ngachau randau perintah nengeri enggau perintah besai udah tu ila, Hasidah madah, nya enda ngeruga aum kededua perintah nengeri enggau besai ti berandauka pekara nya.

Tang ku iya perintah nengeri patut meri penerang enggau bebendar negika hak Sarawak bekaul enggau chukai nyual produk petroleum.

“Aku ngasaika enda (ngeruga), tang amat beguna kitai meri penerang enggau bebendar madah iya nya kitai deka terus minta lima peratus chukai jual.

“Tu hak kitai enggau tu siti pekara ti deka terus kitai laban,” ku iya.

Nambahka ke nya ditanya baru sekalika perintah nengeri bisi pilih bukai nyema peminta Sarawak ba hak nya enda dikeamatka, Hasidah madah, nengeri tu mayuh pilih bukai nyengkaum ulih dibai ngagai renggat kort.

“Mayuh pilih, kitai selalu bisi mayuh pilih baka ditetapka nengah kort, tang naka ke diatu kitai agi dalam renggat berandau tauka berunding.

“Nya semua penerang Proffesor (Saleem Faruqi) nya, nya penemu iya, kitai bisi penemu kitai empu, Dato Sri JC Fong deka mansutka penemu kitai,” ku iya.

Kemari, bepelasarka sebuah portal berita, Pakar undang-undang konstitusyen Shad Saleem Faruqi madahka singkang Perintah Sarawak ti netapka chukai nyual ba produk petroleum enga nyadi penanggul laban perintah semina ulih meri chukai ba barang to ari baruh rintai nengeri Konstitusyen Perintah Besai.

Shad Faruqi madahka produk petroleum ti dipadahka dalam rintai perintah besai ari baruh ‘Jadual Kesemilan’ konstitusyen.