LIMBANG: Kaul Ngatur Komuniti Genturung Pendiau (MPKK) ti dibantaika perintah Pakatan Harapan (PH) ngambika ditumbuh di Sarawak bisi kaul politik lalu tau ngeruga pengelikun, pengelantang enggau penegap adat nyiri ke sebedau tu.
Temenggung Nicholas Buyok Pura madahka bala ketuai raban bansa di pelilih Limbang sepenemu mantah pengawa numbuhka MPKK di Limbang laban nya deka mayuh agi mai penyai ari pemaik.
“Nya kebuah kami semua ketuai raban bansa di Limbang bebendar mantah pengawa numbuhka MPKK di pelilih ini,”ku iya ba aum media kemari.
Nyempulang iya Jun Silah, Pemancha Abu Tinggal, Pemancha Leong Boon Ming, Penghulu Ekit Awang enggau ketuai raban bansa ke bukai.
Ku iya, Komiti Pemansang enggau Pengelikun Genturung Pendiau (JKKK) ke dichiri perintah nengeri ari baruh Ordinan Ketuai Raban Bansa enggau Ketuai Bansa 2004 ungkup tetiap genturung pendiau di pelilih Limbang sendangn ngembuan tanggungpengawa kediri empu.
“JKKK seke diatu nyata chukup manah, agi relevan sereta ngasi amat ngenataika pemadah enggau matau projek genturung pendiau, bejalaika aktiviti sereta mutarka penanggul lalu ngintu pengelantang pendiau peranak menua ngambika seruran gerai, selamat lalu ngiga penatai pemisi enggau likun,”ku iya.
Taja pia ku iya, bala ketuai raban bansa di Limbang nadai ngenggaika pemansang ti deka digaga perintah besai ba renggat nembiak redak. “Adih belanja nya tau diberi ngagai ejensi perintah besai ke bisi di Limbang tauka tau di b eri nen gah Opis Pelilih Menua enggau JKKK ke bisi diatu,” ku iya.
Ngenang nya silik ku iya, pengawa numbuhka MPKK di Sarawak enda relevan laban besibil enggau tanggungpengawa JKKK di genturung pendiau enggau rumah panjai.
“Nya bebida enggau pengawa numbuhka nya di Semenanjung, JKKK udah direrak perintah besai tang di Sarawak kitai agi bisi JKKK ti bejalaika epngawa nyadi jematan entara perintah nengri enggau perintah besai nyengkaum rayat ba enggat ke baruh,” ku iya.
Limbang bisi 163 ketuai raban bansa enggau tuai rumah lalu penyampau nya nyengkaum 72 ketuai raban bansa enggau tuai rumah di DUN Bukit Kota enggau 91 ketuai raban bansa enggau tuai rumah di DUN Batu Danau.