Anda di sini

Duit turu dikena numbuhka Inisiatif Data Besai Etnik Borneo deka diberi

 Abdul Karim (dua kanan) enggau (ari kanan) Dr Bujang, Dr Maulana, Amelia sereta Sharkawi bejadi Aum Antarabansa Sains Sosial dan Kemanusiaan (ICOSSH 2019).
KELAI BEJADI: Abdul Karim (dua kanan) enggau (ari kanan) Dr Bujang, Dr Maulana, Amelia sereta Sharkawi bejadi Aum Antarabansa Sains Sosial dan Kemanusiaan (ICOSSH 2019).

BINTULU: Duit turu dikena bejalaika pansik deka diberi nengah Opis Menteri Dagang Temuai, Seni enggau Main Asal  Sarawak ngambi numbuhka Inisiatif Data Besai Etnik Borneo, ulih di kemujurka.

Menteri opis nya Datuk Abdul Karim Rahman Hamzah madah, rega Data Besai Etnik Borneo deka nyadi besai amat laban nya deka matak mayuh agi pemansik menua tu enggau ari menua luar ngaga pansil kelebih agi dalam bidang pansik etnik.

Nya alai ku iya, perambu numbuhka ‘Kursi Pansik Pehin Sri Adenan Satem’ inisiatif ke manah ti dipejalaika Universiti Putra Malaysia (UPM) Kampus Bintulu dikena ngaku sereta  meri basa ngagai bantu ex- kepala menteri nya ngagai Sarawak enggau rayat nengeri tu.

Menteri Nembial Lumba enggau enggau Main nya  madah, pengelama idup iya, ‘Tok Nan’ (Adenan) udah mai pemansang besai ngagai rayat nengeri tu nengah chara nerenak penyerakup  ba pupu bansa, enda ngira bansa  taujka jalai pengarap.

“Nengah perambu numbuhka Kursi Pansik Pehin Sri Adenan Satem, pengawa ti dipejalaika dalam pansik etnik Borneo ulih dikerembai nengah pengawa numbuhka data besai bepelasarka mayuh bengkah pansik ba raban bansa di menua tu,” ku iya.

Iay bejaku munyi nya ngarika Kepala Menteri Datuk Patinggi Abang Johari Tun Openg lebuh bejadi Aum Antarabansa Sains Sosial dan Kemanusiaan (ICOSSH 2019) ti berambaika leka jaku’Mengintegrasikan Budaya dan Tamadun Melayu: Perspektif Sains Sosial dan Kemanusiaan’ di sebuah hotel tebilang ditu ensanus.

Abdul Karim ngarapka sukung ari perintah enggau opis  menteri iya ulih ngemayuhka agi asil pansik, keleb ih agi  pansik etnik di Sarawak ke mega tau nyadi referan dikena ngaga polisi pemansang menua.  

“Kami ngelaluka pengawa numbuhka Kursi P nsik Tok Nanke diperambu nya, ti deka diengkah ari baruh Palan  Pansik Etnik Borneo di Kampus UPM Bintulu, lalu dipejalaika Fakulti Sains Sosial enggau Pengatur Pengawa.

“Tu deka mantu dalam bidang pansik sains sosial ke bekaul enggau raban etnik Borneo kelebih agi ti bisi di Sarawak,” ku iya.

Dulu ari nya, Direktor UPM Kampus Bintulu Prof Dr Bujang Kim Huat madahka perambu numbuhka ‘Kursi Pansik Pehin Sri Adenan Satem’ nya nyadi chara institusyen ngaku pengawa kepenudi Adenan ngintu pengelikun ba bemacham etnik di Sarawak.

“Nyentuk ke diatu, rayat Sarawak mengkang ingat ke bantu enggau pengawa ke udah digaga Tok Nan taja pan iya nadai agi enggau kitai.

“Iya amat dipebasa laban dikelala nyadi ketuai ti bepelasarka rayat enda ngira bansa enggau ke bukai,” ku iya.

Ba pengawa ngintu identiti etnik di Borneo, Adenan mujur ningkilka leka jaku ‘Lain’ ba pengawa ngenukuka bansa di Sarawak, ku iya.

“Nengah pengawa nya, etnik bansa asal Sarawak ulih nulis nama etnik sida empu ba semua pengawa rasmi perintah,” ku Bujang.

Prof Dr Victor King ari Universiti Brunei Darussalam, Prof Ulung Datuk Dr Shamsul Amri ari Universiti Kebangsaan Malaysia enggau Prof Dr Jayum Jawan ari UPM udah meri licha ba aum nya ti berandauka bemacham topik.

Sama bisi datai ICOSSH 2019 Dr Mohamad Maulana Magiman, Ketuai Pemesai Eksekutif Majlis Seni Sarawak Sharkawi Amit dan Ketuai Pemesai Operasyen Biro Konvensyen Sarawak Amelia Roziman.