Anda di sini

Sarawak bisi penemu enggau interpretasyen kediri, ku Hasidah

SHARIFAH HASIDAH
SHARIFAH HASIDAH

Dikarang Rengenyan Labang 

KUCHING: Perintah Sarawak enda setuju enggau penemu pakar undang-undang konstitusyen Prof Datuk Dr Shad Saleem Faruqi ti madah nengeri tu enda ulih ngeletakka chukai jual ba produk petroleum.

Menteri Muda ba Opis Kepala Menteri (Undang-undang, Kaul Nengeri-Perintah Besai enggau Pematau Projek) Sharifah Hasidah Sayeed Aman Ghazali madahka, perintah nengeri bisi penemu enggau interpretasyen ke diri empu pasal pekara nya.

"Ba kitai perintah nengeri Sarawak, kitai enda setuju enggau penemu ke dipansutka Prof Shad Saleem Faruqi.

"Kitai bisi penemu enggau interpretasyen ke diri empu pasal konstitusyen," ku iya seraya madahka siti penerang deka dipansutka perintah nengeri bekaul enggau pekara nya.

Sharifah Hasidah dikerandau raban pemberita pengudah ti ngulu pengawa nyain sempekat pemereti ati (MoU) entara Amalgamated Batteries Manufacturing (Sarawak) Sdn Bhd enggau Jujiang Power Technology Co. LTD. (China) ba sebuah hotel ditu, sehari tu.

Ditanya baru sekalika penerang ke dipansutka Shad Saleem nya deka ngeruga randau tauka runding perintah nengeri enggau perintah besai udah tu ila, iya madahka, nya enda ngeruga aum kededua perintah nengeri enggau besai ti berandauka pekara nya.

Tang ku iya perintah nengeri patut meri penerang enggau bebendar negika hak Sarawak bekaul enggau chukai jual produk petroleum.

"Aku ngasaika enda (ngeruga), tang amat beguna ba kitai meri penerang enggau bebendar madah iya nya kitai deka terus minta lima peratus chukai jual.

"Tu hak kitai enggau tu siti pekara ti deka terus kitai laban tauka gagai," ku iya.

Nambahka ke nya ditanya baru sekalika perintah nengeri bisi pilih bukai nyema peminta Sarawak ba hak nya enda dikeamatka, Sharifah Hasidah madahka, nengeri tu mayuh pilih bukai nyengkaum ulih dibai ngagai peringkat kort.

"Mayuh pilih, kitai selalu bisi mayuh pilih baka ditetapka nengah kort, tang naka ke diatu kitai agi dalam peringkat berandau tauka berunding.

"Nya semua penerang Profesor (Shad Saleem) nya, nya penemu iya, kitai bisi penemu kitai empu, (Penyanding Penemu Undang-undang Sarawak) Dato JC Fong deka mansutka penemu kitai," ku iya.

Kemari, bepelasarka sebuah portal berita, pakar undang-undang konstitusyen Shad Saleem madahka singkang Perintah Sarawak ti netapka chukai jual ba produk petroleum enga nyadi penanggul laban perintah semina ulih meri chukai ba barang to ari baruh rintai nengeri Perlembagaan Persekutuan.

Shad Saleem madahka produk petroleum ti dipadahka dalam rintai perintah besai ari baruh Jadual Kesembilan Konstitusyen.