Anda di sini

Rega minyak di Sarawak enda patut ngelui RM2 seliter

ABDULLAH
ABDULLAH

KUCHING: Rega minyak di Sarawak enda patut ngelui RM2 seliter laban nya nengeri ti ngeluarka minyak.

Menteri Muda Pekara Korporat enggau Unit Komunikasyen Mensia Mayuh Sarawak Abdullah Saidol enggau nyemetak iya enda ngira taja Perintah Besai napi mayar subsidi ke lebih besai enti rega minyak di Sarawak baruh agi ari RM2 seliter.

“Kebuah tu, laban ngelama tu subsidi minyak menua datai ari pemansut asil minyak enggau gis Sarawak.

“Kitai di Sarawak patut lebih bejejaga lalu anang mudah gagit laban orang ke mantaika program tu nya Chairman Pakatan Harapan (PH) Sarawak, Chong Chieng Jen ke suah ngasuh orang saru ba mayuh pekara ke udah disemaya iya ungkup Sarawak,” ku iya lebuh dirandau kemari.

Abdullah nerang sentang rega minyak petrol RON95 mengkang RM 2.08 seliter ungkup rayat Sarawak taja skim subsidi petrol ‘besasar’ deka ditetapka 1 Januari taun baru.

Chong ke mega Sapit Menteri Dagang Dalam Nengeri enggau Pekara Penguna madah, RON95 ditetapka nitih rega ke diatu ngagai semua rayat di Sarawak.

“Reti nya semua orang ke ngempu perengka pengangkut di Sarawak deka ngasai petrol subsidi baka ke diatu,” ku Chong.

Berebak enggau nya bekaul program Subsidi Petrol, Abdullah madah, iya bedau sedia deka nerang enggau silik laban kurang meretika sentang struktur program nya lalu bakani iya deka dipejalaika.

“Nitihka Chong, rega minyak di Sarawak ke ditetapka RM2.08 deka semampai murah agi ari Semenanjung.

“Nyadi, enti rega minyak di Semenanjung ba tikas rega RM2.00, kati automatik rega minyak di Sarawak, Sabah enggau Labuan deka berubah ngagai rega ke lebih agi murah? ku Abdullah.

Bekaul enggau pengandal Belanja Menua ti deka dibantai kena 11 Oktober, iya madah nya ukai semina ba rayat tang belanja tu patut lurus enggau amat ari Perintah Besai dikena mantaika penyiru sida ngagai pengelantang rayat.

“Ukai semina nuju ngagai pengelantang rayat tang mega siti strktur belanja ti lurus sereta amat. Belanja menua ukai dipansik aja tauka diperatika rayat kitai tang mega orang beranakka puku enggau menua bukai. Sida begunaka tikas pemanah ekonomi menua kitai,” ku iya.

Nitihka iya, Opis Menteri Pekara Wang ukai semina bejalaika tanggungpengawa mantai enggau bajet ti dikearap dikena nyendiaka mayuh macham pemansang di menua kitai tang numbuhka Polisi Ekonomi Ke Ulih Dipechaya enggau Dijapai ke mandangka fiskal kitai diatur enggau manah.

“Ungkup pemaik semua rayat Malaysia, anang kelalu mayuh ulah tauka ‘lemak’ politik dalam mantaika isi belanja menua. Tikas ekonomi enggau pengelantang rayat mesti dikemerat,” ku iya nyemetak.

Ngarika rayat menua pesisir, pekara dikearap kitai ti dikemerat ba belanja menua iya nya pemansang menua pesisir, pelajar enggau pengelantang orang bumai sereta orang berikan.

“Keterubah iya nya agih belanja pemansang ba menua pesisir baka perengkaguna klinik baru, balai bomba enggau polis enggau perengkaguna ke bukai ti nyadi tanggungpengawa Perintah Besai.

“Kedua, agih belanja ba pelajar ke alai ukai ngangkatmanah sekula repok tang nyendiaka perengkaguna sekula ke manah agi baka makmal, perengkaguna rumah pengajar, buding nembiak enggau perengkaguna lumba main.

“Nangkanka nya, agih belanja khas ungkup orang berikan enggau orang bumai,” ku iya seraya nambah mayuh macham bantu patut disediaka ngagai bala orang bumai enggau orang berikan laban sida nya bisi tanggungpengawa besai dalam mekal pemansut pemakai ngagai mensia mayuh.

“Pengawa ngetuka ba pemakai import deka ngerugika menua, nya kebuah Perintah Besai patut numbuhka polisi dikena meransang pesereta rebak biak dalam sektor betanam betupi enggau chara berikan asil tasik moden.