Anda di sini

Projek Bekal Ai Bario tejanggal ketegal gaya jalai ke Bario enda likun ditengah

Advertisement
 Gerawat matau projek ngaga bekal ai Bario di Pa Umor.
NGABAS PROJEK: Gerawat matau projek ngaga bekal ai Bario di Pa Umor.

MIRI: Pengawa ngaga Projek Bekal Ai Bario tejanggal berindik ari gaya jalai ngagai Bario ke enda likun ditengah ketegal gaya hari ke enda manah.

Projek Opis Mneteri Utiliti enggau Opis Bekal Ai Menua Pesisir (JBALB) ke beungkus RM25 juta nya dipejalaika berengkah 6 Mac ti udah lalu dipelaba tembu bulan Mac 2020.

Kaban Kunsil Nengeri (ADUN) Mulu Datuk Gerawat Gala madah, kunteriktor udah ngiga chara ke patut dikena nentuka projek nya tembu nitihka timpuh ke udah ditetapka.

“Aku puas ati enggau projek nya lalu ngarap projek nya ulih tembu nitihka timpuh ke udah ditetapka ungkup pengelantang rayat ba kandang menua nya,” ku iya ba siti penerang pengudah ngabas seraya bejalaika tanggungpengawa ngagai Projek Bekal Ai Bario di Pa Umor, Bario bedau lama udah.

Enti udah tembu ila, iya ulih mai pemaik ngagai lebih 1,000 iku peranak di Bario ari kandang menua Arur Dalan, Bario Asal, Arur Layun, Bued Main Beruh, Ulang Palang B, Pa’Ramapuh A, Pa’Ramapuh B, Padang Pasir, Kampung Baru, Pa’ Umor, Pa’ Ukat, Pa’ Lungan enggau Pa’ Derung.

Projek ai beresi tu ngena ai ari pemansut ai sungai pemadu besai di Bario iya nya Sungai Depur.

Berebak enggau nya, Gerawat nengah awak iya nemuai ngagai Loji Rawatan Air di Long Seridan ngansak JBALB mutarka jampat penanggul bekal ai beresi ke ditapi peranak kandang menua nya.

“Aku dipadah peranak genturung pendiau sentang penanggul ai ti nyadi belama.

“Taja Loji Rawatan Air Long Seridan udah tembu enggau udah dipejalaika tang sida agi napi penanggul bekal ai,” ku iya.

Advertisement