Anda di sini

Perintah GPS komited mekal elekterik 24 jam ngagai semua rumah panjai

Advertisement
 Masing nyuaka Surat Nerima SARES ngagai Tuai Rumah Nading seraya dikemataka bala bukai.
ENGKITA: Masing nyuaka Surat Nerima SARES ngagai Tuai Rumah Nading seraya dikemataka bala bukai.

KAPIT: Sapit Kepala Menteri Tan Sri Datuk Amar Dr James Jemut Masing kena Hari Enam minggu nyin tadi udah nyerahka Projek SARES Fasa Ke-3 ba Rumah Nading Jalin, Ulu Sungai Gaat, Baleh.

Ku iya, Perintah GPS komited nyendiaka bekal kuasa leterik ti beresi sereta tau dikearapka 24 jam ngagai semua rumah panjai di serata nengeri.  

“Manggai ba taun 2025, semua rayat Sarawak di serata nengeri tu deka ngasaika bekal lekterik 24. Tu dipunka Perintah GPS nengah Projek Bepelasarka Komuniti dikena nyendiaka bekal elekterik di mengeri tauka di menua pesisir. Kandang mendua ke udah datai jalai deka disambung grid nengeri, lalu genturung pendiau tauka rumah panjai di ulu entigis deka dibekal elekterik nengah alternatif bekal elekterik Hibrid enggau SARES,” ku Masing.

Rumah panjai di sepemanjai Sungai Gaat ke dibekal lekterik nengah SARES iya nya Rumah Tungku, Rumah Nading, Rumah Sagen, Rumah Mamat, Rumah Sait, Rumah Jaweng, Rumah Sugit, Rumah Kupa enggau Rumah Jegai.

Ku iya, pengelama pejalai nepan perau ngagai Rumah Nading iya nya lapan jam.

Suba ku iya, sida ditu ngulihka lekterik ngena injin api diesel ti mar ungkus. Dikena nyendiaka bekal eleterik ti tau dikearapka, perintah melanja RM60,000 ungkup sebuah ruang bilik dikena ngelekatka kuasa nya, ku iya seraya madahka Rumah Nading bisi 28 pintu. Perintah melanja urung RM1.7 milion dikena ngenerangka rumah panjai nya. Perintah GPS nanggung semua ungkus nya ngambika peranak rumah panjai bisi bekal lekterik ti enda bebayar.

Lebuh ke nyaut peminta ari Tuai Rumah, Masing ngelalau JKKK ngaga anggar ungkus nyeruri atap rumah panjai nya ke udah didirika kenyau ari taun 1983.

Iya mega madahka Opis Kereja Raya deka nyukat akes jalai nuju rumah panjai nya.  

Berebak enggau nya, iya bisi ngungkupka MRP sepenyampau RM42,000 ngagai rumah panjai nya, lalu Datuk Liwan Lagang meri RM10,000.

Dulu ari Maing udah nyerahka Projek SARES Fasa Ke 3 enggau pangkalan besi ke baru tembu digaga.

Sama bisi ngulu pengerami nya Residen Kapit Nyurak Keti, Sapit Residen Kapit Galong Luang, DO Bukit Mabong Douglas Pungga, Superintendent Opis Tanah enggau Survei Kapit Sagu Unting, OCPD Kapit DSP Freddy Bian, menijar SARES Chrisopher Wesley Ajang, Sekretari Politik Kepala Menteri Sarawak Nicholas Kudi Jantai, bala ketuai opis perintah enggau sekeda ketuai raban bansa.

Advertisement