SERIAN: Orang kereja perintah di nengeri tu enda tau enda ngembuan budaya inovatif maya bejalaika pengawa ninting hari sida menjalankan, pia ku Sekretari Perintah Nengeri Datu Jaul Samion.
Ku iya, perintah nengeri fokus ngagai inovasyen nyadi siti ari batang pekara dikena ngubah servis pengereja pengawa perintah nengeri.
“Inovasyen enggau transformasyen enda tau diselara sereta amat dikemeratka perintah nengeri dikena ngiring pengawa ngemujurka strategi nyadi menua maju sereta bepenatai pemisi besai nyerumba taun 2030.
“Nya kebuah,nyadi pekara dikemeratka kitai ngenegapka budaya inovatif dikena nentuka sistem meri servis kita nyadi jampat agi, sikar sereta efisyen,” ku iya ba pengerami ngelancharka Inno Aqua Innovation Opis Betanam Betupi beserimbai enggau Minggu Inovasyen Pengereja Pengawa Perintah Nengeri ba Palan Betanam Betupi Tarat ditu, kemari.
Iya bejaku munyi nya dalam teks jaku iya ke dibacha Ketuai Seksyen Komersial enggau Latih Industri, Opis Menteri Bettanam Betupi Moden, Tanah Adat enggau Pemansang Kandang Menua, Dr Gluma Saban.
Ku Jaul, inovasyen udah nyadi penyanding ngagai mayuh menua ngambika nyadi menua maju, moden sereta bisi teknologi tinggi.
“Nya kebuah, patut amat semua raban pengereja pengawa perintah ngenegapka pengawa nuju budaya inovasyen enggau integriti tinggi lebuh bejalaika pengawa ninting hari,” katanya.
Ku iya, semua renggat orang kereja perintah nengeri patut seruran kreatif, inovatif sereta ngembuan integriti lebuh bejalaika pengawa sida.