KUCHING: Perintah Sarawak deka ke perintah meri rega ke setipak nengah sempekat komersial enti deka ngurangka chukai nyual produk petroleum.
Kepala Menteri, Datuk Patinggi Abang Johari Tun Openg madahka, nengeri tu patut ulih ngambi bagi dalam aktiviti ngulih enggau memproses minyak enggau gis.
“Aku setuju deka ngurangka, tang aku (Sarawak) mesti bulih utai ti setipak, lalu utai ke setipak nya enda tau enda nengah sempekat komersial.
“Nama ti dipejalaika kami iya nya nambahka ekuiti dalam LNG, ke diatu kitai bisi 25 peratus.
“Dalam reti jaku bukai, nama utai ke dipadahka aku iya nya kitai ulih nyereta dalam aktiviti ngulih enggau memproses minyak enggau gis kitai,” ku iya dalam sesi tanya enggau saut forum.
Dulu ari nya Abang Johari meri keynot address ba forum ‘Business Engagement Session with The Chief Minster of Sarawak’, ti diatur Sarawak Business Federation (SBF) ba BCCK ditu, kemari.
bekaul enggau bekunsi, Abang Johari madahka nengeri tu deka asil nya dipekunsi seagi ba ai Sarawak laban ai Sarawak nya dikeempu Sarawak.
“Nya alai diatu pekara tu agi diperundingka sereta aku ngarapka semua pekara nya manah, ngarapka liat ati enggau aku, aku deka negika pekara tu dataika pengujung,” ku iya.
Dulu ari nya iya madahka ari baruh undang-undang patut mayar lima peratus, lalu nya hak nengeri tu.
“Nuan meda, lebuh PETRONAS beoperasyen ba Kanada sida ngasika undang-undang menua nya, lalu lebuh sida beoperasyen ba Sarawak sida mega patut ngasika undang-undang Sarawak,” ku iya seraya madahka pekara nya mudah aja.
Nambahka nya Abang Johari madahka iya udah ngaNjung formula ngagai Menteri Besai lalu kitai semina ngeletakka lima peratus taja pan kebendar ulih ngeletak 10 peratus.
Tang beduduk ari gaya industri petroleum diatu, kitai semina ngeletakka lima peratus ba pengawa eksport enggau penyampau eksport tauka penyampau asil eksport, ku iya.
Lebuh ti meri Keynote Address ba forum nya, iya mega madahka perintah Sarawak ngemeratka empat sektor besai enti deka nyadi nengeri pemadu mansang dalam taun 2030.
Ku iya bisi empat sektor besai dipekemeratka dikena nuju nengeri pemadu maju nengah Langgur Pemansang Malaysia Lumpar ke-12 (RMK).
Taun tu enggau taun baru iya nya taun kepenudi RMK-11, lebuh kitai beratika RMK-11 kitai ngasaika kitai bedau tentu mansang bekaul enggau infrastruktur lalu pia mega ekonomi laban ekonomi ukai tuju ngagai sekeda objektif ke ulhi mai kitai nuju ngagai ekonomi tinggi, ku iya.
“Nya kebuah tim aku patut meda RMK12, laban dikena nyapai 2030 kitai betapi enggau dua RMK iya nya taun 2021-2025 enggau 2026-2030.
“Kitai udah ngelala empat sektor ke enda tau enda dikemeratka dalam RMK12, iya nya keterubah betanam betupi pintar, ke alai pengawa betanam betupi patut berubah ari chara diatu ngagai chara pintar.
“Kedua, kitai enda tau enda ngenegapka sektor dagang temuai enggau servis kitai, ketiga infrasturktur nyengkaum pemansang palan penyangkai kapal enggau keempat iya nya meri latih ngagai pengereja pengawa,” ku iya.
Bekaul enggau forum ti ngena tema ‘Journet to 2030’ bisi dua pekara dikerandauka iya nya betajuk MA63 and what does it mean to the community ulih Dato Sri JC Fong enggau topik kedua Socio-economic transformation of Sarawak towards 2030 and its challenges ulih Prof Dr Fatimah Kari.
Sama bisi ngulu pengerami nya kemari, Sapit Kepala Menteri Tan Sri Datuk Amar James Jemut Masing, Menteri Kaunsil Menua enggau pengawa Berumah Prof Datuk Dr Sim Kui Hian, Presiden SBF Datuk Abang Abdul Karim Tun Openg, Sapit Presiden SBF Datuk Dr Philip Ting enggau ke bukai.