KAPIT: SARES (Skim Nyambung Elekterik Menua Perisir Sarawak) udah meri penampak ngagai 170 buah ruang bilik di Kapit.
Bungkur elekterik di Sarawak udah dikejampatka kenyau SARES dibantaika dalam taun 2017, ke alai lebih 1,700 ruang bilik ari 87 buah rumah panjai enggau genturung pendiau di Kapit diatu udah bisi kuasa tau dikena baru 24 jam ari baruh inovatif inisiatif perintah komuniti.
SARES siti ari sekeda inisiatif ari baruh Pelin Besai Ngenyampatka Nyambung Elekterik, digaga sereta dipelanja Perintah Sarawak nengah Opis Menteri Utiliti Sarawak. Dipejalaika Sarawak Energy Berhad (SEB), SARES disadang nyendiaka ruang bilik ba genturung pendiau ke jauh di ulu entigis nengah kuasa solar tauka hidro mikro dalam timpuh dua nyentuk lima taun ti deka datai.
Bedau lama udah, lebih 1,600 iku peranak ari 170 ruang bilik ari semilan rumah panjai di Sungai Gaat, Kapit udah bisi elekterik 24 jam nengah kuasa tau dikena baru.
Rumah panjai tu iya nya Rumah Tungku Nanga Semirah, Rumah Nading Jalin Nanga Selentang, Rumah Sagen Nanga Ajan, Rumah Mamat Nanga Semirah, Rumah Sait Nanga Puro, Rumah Jaweng Nanga Sandau, Rumah Sugit Nanga Puro, Rumah Kupa Nanga Setapang enggau Rumah Jegai Nanga Sebiro.
Pengerami nyerahka nya udah diatur ba Rumah Nading ujung minggu nyin tadi dikena ngingatka penembu sistem kuasa solar nya, ti dipenyadi Sapit Kepala Menteri, Tan Sri Datuk Amar Dr James Jemut Masing enggau Menteri Muda SARES, Datuk Liwan Lagang.
Sama bisi datai, MP Hulu Rajang Datuk Wilson Ugak Kumbong, Sekretari Politik Kepala Menteri Sarwaak Nicholas Kudi Jantai, Residen Kapit Nyurak Keti, Sapit Residen Kapit Galong Luang, DO Bukit Mabong Douglas Pungga, Superintenden Opis Tanah enggau Survei Kapit Sagu Unting, menijar SEB ungkup SARES Christopher Wesley Ajan, Temenggong Ajang Sirek, Pemancha Steward Sawing enggau Penghulu Jampi Raweng.
Datuk Liwan Lagang lebuh ke dirandau maya pengerami nya madah, pengawa bejalaika SARES ba komuniti nya berengkah ari perambu nyentuk ke projek nya tembu digaga, lalu sida mega dilatih ngintu sistem nya. Tim SARES deka nyadi sukung teknikal sereta deka dianjung kia nyema bisi penanggul besai dikena nentuka sistem nya ulih dikena belama.