KUCHING: Mimbar Permuafakatan Ibu Bapa Malaysia (MAPIM) Sarawak amat positif pasal perambu nyirika warden sekula ari raban ukai pengajar.
Chairman MAPIM Sarawak Omar Immun madahka MAPIM Sarawak setuju enggau perambu nya laban nya ulih ngelempungka tating pengawa pengajar sereta ulih meri awak sida mekuh ngagai sesi ngajar enggau belajar (P&P).
"Kami amat nyukung pekara tu sereta pansik pasal perambu tu patut nyengkaum pemanah enggau pengurang iya.
"Taja pia, aku pechaya pengawa tu mayuh agi meri pemanah lebih agi ngagai pengelantang pendiau pengajar ti mayuh tating pengawa ba sekula," ku iya madah ngagai Utusan Borneo.
Omar ditanya pasal perambu Kesatuan Perkhidmatan Perguruan Kebangsaan (NUTP) ngambika warden sekula dichirika ari raban ukai pengajar sereta Opis Menteri Pelajar Malaysia (KPM) patut beratika perambu nya enggau silik.
Berebak enggau tu Omar madahka MAPIM Sarawak setuju enggau Sapit Menteri Pelajar Malaysia Teo Ni Ching ti madahka pekara nya patut bisi sesi randau ti dalam tauka silik enggau sida ti bekaul nyengkaum pengajar enggau Jabatan Perkhidmatan Awam sebedau dipejalaika tauka dikemeranka.
"Lebuh kitai ngenang pasal warden asrama..kitai mereti iya nya bekaul enggau sida nembiak ke diau ba asrama tauka palan endur bemalam sepemanjai ke besekula.
"Ba ditu meh pemesai guna pangawa warden asrama tauka sekula laban mayuh penanggul ke nyadi ba asrama ke enda ulih ditumpuka pengajar laban tating pengawa ti mayuh," ku Omar ti mega Ketuai Pemadah MAPIM Kebangsaan.
Entara penanggul besai ba asrama ke ditemu baka kes nundi orang, kes nembiak ngisap, kes enchuri barang enggau duit ringgit sereta ke bukai ku iya.
Warden sekula tauka buding ti endang sama bejalaika pengawa nyadi warden nya ku iya, dipeda tauka dikearapka ulih ngurangka pekara negatif laban warden semina mekuh ngagai kereja ke diberi ngagai sida.
Kelimpah ari nya iya madahka penumbuh pangku pengawa warden sekula tauka asrama sepenuhnya mega secara tidak lansung ulih ngurangka ati enda pechaya bala apai indai tauka penyaga lebuh kes nundi enggau malu ba asrama nyadi.
"Isu pengelikun mebiak kenyau beberap taun tu suah endar dikeibuhka Gerempung Ukai Dikuasa Perintah (NGO) baka MAPIM Sarawak enggai gerempung ke bukai.
"Nya alai, kami amat positif ngagai perambu enggau usaha tu sereta ngarapka pelin pelaksanaannya ila deka nyadi nilai tambah ti positif ngagai pemansang sekula ke bisi buding di menua tu," ku iya.
Kena 1 Oktober tu tadi ba sebengkah penegrami di Nilai, Menteri Pelajar Malaysia Dr Maszlee Malik madahka perambu ari NUTP ngambka warden sekula dichirika ari raban ukai pengajar patut dialuska.