KUCHING: Lagu kebangsaan, Negaraku enda patut dikesema baka charta lagu ti ulih ditukar peneka ati, ku Menteri Dagang Temuai, Seni enggau Main Asal, Datuk Abdul Karim Rahman Hamzah.
Nitih ku iya, lagu Negaraku iya nya siti pekara ti tuchi ti udah dipersetuju nyadi lagu kebangsaan semua nengeri ti numbuhka Malaysia sereta iya patut dipebasa.
“Lagu kebangsaan jarang ditukar, nya siti pekara ti tuchi lalu udah disetuju maya numbuhka menua sereta iya patut ditanka.
“Kitai enda ulih nukar(lagu kebangsaan) baka charta lagu tauka charta muzik pemadu manah, enti bisi orang deka ke baka nya, enti iya bisi menua kediri tau mih.
“Tang kitai patut ingat ke alai lagu kebangsaan nya udah dipesetuju enggau kitai patut nitih sereta bebasaka nya, anang dikelese,” ku iya lebuh dirandau pengarang berita pengudah bejadika program’ What About Kuching (WAK) 2019 dan Persidangan Manik Borneo Antarabangsa 2019 (BIBCo 19)’ ditu, kemari.
Iya madahka pekara nya lebuh ti ngenang peminta Parti Bumi Kenyalang (PBK) ti deka ke siti lagu kebangsaan baru digaga dikena nganti Negaraku laban dipadahka lenyau pengasal .
Presiden PBK, Voon Lee Shan madahka nadai salah deka bisi lagu kebangsaan baru, kelebih agi enggau lagu sereta leka lagu ti senipak enggau budaya kitai empu.
Kelimpah ari nya, Karim bebendar madahka patut ditemu fakta iya nya, maya Malaysia ditumbuhka semua nengeri ti bekaul udah setuju Negaraku iya nya lagu kebangsaan.
“Nya alai ba enda ngira bagi wilayah ti numbuhka sesebuah menua, enti udah setuju enggau lambang ti dikumbai bendar tauka lagu kebangsaan, iya patut dipebasa.
“Anang kitai nyampurka politik enggau basa kitai ngagai lagu kebangsaan laban iya dua pekara bebida,” ku iya.
Bekaul enggau pekara nya, iya madahka ngagai sida ti enda puas ati tauka enda bebasaka lagu kebangsaan, sida patut meda pekara nya.
“Enti bisi ngasaika kitai nadai bulih hak ke patut enggau hak kitai lenyau, nya nama iya politik. Nya alai ayanka peneka nya maya pengawa bepilih ukai nengah chara enda bebasaka lagu kebangsaan,” ku iya.
Sama bisi ba pengerami nya, Menteri Muda Dagang temuai, Seni enggau Main Asal Datuk Sebastian Ting, Sekretari Mendam Opis Menteri nya, Hii Chang Kee enggau Direktor BIBCo, Heidi Munan.