Anda di sini

KM deka mansut penerang bekaul pemuntan PETRONAS mayar chukai ngagai Sarawak

Advertisement
 Abang Johari betabi enggau pemesai raban bansa ke datai ngulu seminar nya. — Gambar Chimon Upon
SELAMAT DATAI: Abang Johari betabi enggau pemesai raban bansa ke datai ngulu seminar nya. — Gambar Chimon Upon

KUCHING: Kepala Menteri Datuk Patinggi Abang Johari Tun Openg, deka meri penerang enda lama agi bekaul pemuntan Syarikat Petroliam Nasional Berhad (PETRONAS) ti udah diberi timpuh nyentuk ujung bulan September tu tadi mayar lima peratus Chukai Nyual ti ditumbuhka Perintah Sarawak ba produk petroleum ti berengkah pun taun tu tadi.

“Ila aku cherita ngagai kita (pengarang berita),” ku iya nyaut enggau pandak.

Iya ti enggai meri penerang silik bekaul pekara nya lebuh dirandau raban pengarang berita pengudah pengerami nutup Seminar Integriti Kepimpinan Masjis dan Surau Nengeri Sarawak’ ti diatur ba Dewan Majma Tuanku Abdul Halim Mu’adzam Shah ditu, kemari.

Berebak enggau tu lebuh ditanya bekaul enggau juluk perintah besai ti deka numbuhka baru Chukai Barang enggau Servis (GST), Abang Johari madahka, nya bepanggai ba Menteri Besai Tun Dr Mahathir Mohamad.

“Aku enda nemu, bepanggai ba Kuala Lumpur. Enda lama diketu enda lama enda,” terang iya.

Ngenang pasal seraban aktivis ti enggai bediri maya lagu kebangsaan ditebah ti nyadi apin lama, iya nyerahka pekara nya ngagai Polis Diraja Malaysia (PDRM) bejalaika eksyen.

Kena 13 September tu tadi, Chairman Komiti Perunding nengeri Sempekat Malaysia 1963 (MA63) Datuk Amar Mohd Asfia Awang Nassar madah, PETRONAS Diberi timpuh nyentuk September tu mayar chukai nya ngagai Sarawak.

Ku iya, PETRONAS nadai pilih bukai dikena nyeliahka diri ari mayar chukai nyual nya berindik ari undang-undang ke udah bisi di nengeri tu.

Nambahka ku iya ti mega Speaker Kunsil Nengeri (DUN), bebendar madahka Sarawak melabaka PETRONAS deka mayar chukai jual nya.

Advertisement