KUCHING: Ulah enchuri kabel dipelabaka nyadi kebuah kabel elekterik teberingkas ti ngujungka dua iku menyanak balat bakal, pengudah van ke ditepan seduai telantakka kabel lalu angus ba palan kereja Jalai Besai Pan Borneo di Tatau kena Hari Satu tu tadi.
Seraya mantaika penyinu ati sentang insiden, kompeni utiliti nya Sarawak Energy madah, sida bejalaika pansik silik ari semua sukut ti betuaika Unit Pemeresa Elekterik ari baruh Opis Menteri Utiliti nya.
“Pansik tumu mandangka kabel bumi dikempat, ke dipechaya dichuri penchuri kabel ti ngujungka nya ngeruga pengelikun, lalu kabel nya tadi agi bisi kuasa (elekterik) lebuh penusah nya nyadi ,” ku iya ba sebengkah penerang, kemari.
Nitihka penerang nya, insiden nya bela ngujungka bekal elekterik di serata pasar mit Tatau putus, nyengkaum Klinik Pengerai Tatau kenyau ari pukul 7 pagi.
Bekal elekterik di pasar Tatau pulai manah baru pukul 9 pagi, lalu bekal kuasa di Klinik Pengerai Tatau pulai manah baka selamapukul 1 tengah hari.
Mensia mayuh dilalau ngenyauhka diri ambis nadai lima meter tauka 15 kaki ari kabel elekterik ke teberingkas nya, sereta seruran bisi peragam tetiap kabel elekterik ti mengkang bisi kuasa, kelimpah jampat ngangauka Sarawak Energy minta bantuan nengah lumur 1300 88 3111.
Kabel elekterik ke teberingkas nya udah ngasuh ubah voltan nyadi ba atas tanah, lalu enti bejalai semak nya tau ngujungka kena sot ketegal elekterik.
Ba penyadi kabel elekterik ke teberingkas lalu labuh ats entukar,mensia mayuh dilalau anang pansut entukar nyentuk ke bantu datai, sereta nagkan orang bukai ngambika ngenyauhka diri sereta anang negu entukar nya.
Nyema enda tau enda pansut ketegal entukar nya angus, engkechit pansut lalu kededua kaki mesti sereta negu tanah. Tentuka kededua kaki terus atas tanah lalu merejuk urung 10 meter ari endur ke nyadi nya.
Sarawak Energy beratka pengelikun lalu ngansak kunteriktor ti ketiga ngambi singkang tambah bejejaga lebuh ke kereja dsemak enggau kabel kuasa, ke pengelikun diri enggau orang bukai.
Ba penusah ke n yadi kena Hari Satu tu tadi, siku deriba van indu nyauka 70 peratus betu lalu anak lelaki iya ke beumur 10 taun betu 15 peratus.
Ketuai Polis Pelilih Tatau DSP Dennis Bunyam madah, pansik tumu tetemuka seduai menyanak nya bakal lebuh kabel elekterik tekena mua van nyentuk ngujungka injin angus 10 peratus.
Empat iku agi anak mit ke sama dalam van sempat nyelamatka diri.