KUCHING: Sarawak ngeksport ikan tilapia mirah Batang Ai, Lubok Antu ti keterubah endar ke menua Singapura.
Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madah, ikan nya diekport Borneo Ecofish Sdn Bhd ngagai ShengSiong Gropu di Singapura.
“Sehari tu (kemari) 2 Oktober, hari besejarah ngagai industri betanam betupi di Sarawak. Kitai nyadi saksi pengawa ngeksport keterubah ikan ari Batang Ai ngagai Singapura.
“Sehari tu kitai ngeksport 12 tan ikan, tu produk Borneo Ecofish ti diasilka ba Batang Ai lalu pemeli di Singapura iya nya Sheng Siong ti bisi 56 iti outlet,” ku iya seraya madahka nya singkang panjai ngekport produk ke menua luar.
Uggah ti mega Menteri Wang Kedua mansutka pekara nya lebuh berandau enggau raban pengarang berita pengudah iya bejadi pengawa ngeksport ikan tilapia ke Singapura ti diatur ba Sea Horse Corporation Sdn Bhd ditu, kemari.
Nitihku Uggah eksport keterubah ikan tilapia nya ke Singpura kelai positif numbuhka Opis dagang enggau Dagang Temuai Sarawak (STATOS) di Singapura kena 16 Ogos taun tu tadi.
Kitai chukup beterima kasih ngagai visyen Kepala Menteri Datuk Patinggi Abang Johari Tun Openg ti numbuhka STATOS lalu nengah opis dia (STATOS) ulih terus bekomunikasyen enggau pembeli ari menua Singapura, ku iya.
“Maya kitai betemu enggau ShengSiong di Singapura kena 16 Ogos, kami nguji nyual ikan produk Borneo Ecofish, kami mai chunto ikan kin, kami bisi objektif din.
“Kitai endang arap bendar STATOS ulih mantu, diatu chairman iya nya Tan Sri Datuk Amar Mohamad Morshidi Abdul Ghani orang ti bepeneleba sereta bisi kaul ti chukup manah enggau Singapura, lalu deka mayuh agi produk betanam betupi diekpsort ke Singapura enggau menua luar bukai.
“Tu kelai positif kitai ngubah betanam betupi di Sarawak, kitai nuju ngagai objektif nyadi nyadi pengeksport lebuh manggai taun 2030 sereta kitai mega ngemeranka teknologi moden,” ku iya.
Bejaku baru Uggah madah, baka menua New Zealand bisi 5 milion iku penyampau tubuh mensia, tang menua nya ngasilka produk pemakai ungkup 40 milion iku. Reti nya menua New Zealand nyual produk ungkup 35 milion iku orang, gaya ti baka tu mih juluk kitai, ku iya.
Uggah arap bendar enggau sekeda asil betanam enggau produk ke ulih diasilka di nengeri tu, Sarawak dudi hari ila deka nyadi tampak agi dalam pengawa betanam betupi.
“Reti ku aku ditu iya nya peluang kereja enggau dagang deka tebuka ukai ungkup orang baka aku tang ungkup orang biak. “Aku meransang peranak Sarawak ngambika sama ngambi bagi dalam pengawa ngasilka asil betanam betupi dikena nyapai objektif nyadi pengeksport udah tu,” ku iya.
Lebuh ti ngenang pasal Sea Horse, Uggah madahka nya palan peribit ti nyadi alai ngumpul, mungkus enggau memproses barang pemakai ukai semina ikan tang mayuh pemakai bukai baka buah enggau ke bukai.
Sama bisi datai ba pengerami nya kemari, dua menteri muda opis menteri betanam betupi, tanah adat enggau pemansang kandang menua Datuk Roland Sarawak enggau Dr Abdul Rahman Ismail, Managing Direktor Borneo Ecofish Sdn Bhd Thomas Hii enggau Direktor Sea Horse Corporation Sdn Bhd Lee Choon Kheng enggau Morshidi sereta ke bukai.