KUCHING: Pengawa nyiri warden ukai ari raban pengajar siti perambu ke chukup engkeman dikena ngurangka tating pengawa pengajar laban nya ukai batang pengawa pengajar.
Presiden Kesatuan Guru Bumiputera Sarawak (KGBS), Ahmad Malie madahka sida nyukung perambu Kesatuan Perkhidmatan Perguruan Kebangsaan (NUTP) ti minta warden sekula dichiri ari raban ukai pengajar.
Laban ku Ahmad, batang pengawa pengajar iya nya bejalaika pengawa ngajar enggau belajar (P&P) ba bilik darjah.
“KGBS nyukung perambu NUTP ti meri langgur penemu ngambika warden sekula dichiri ba orang ke ukai pengajar. KGBS nyukung perambu tu laban nyaulih dikena ngurangka tating pengawa pengajar ari pengawa ke ukai patut dikereja pengajar.
“Ke bendar perambu tu udah lama dibantaika raban gempung gerempung pengajar dalam aum begulai enggau Opis Menteri Pelajar Malaysia (KPM)tang perambu tu bedau ulih diperundingka sida (KPM).
“KGBS ngansak tauka ngarapka KPM bejalaika pansik silik enggau lengkas dikena nentuka perambu tu ulih dipejalaika ila,” ku iya lebuh dirandau Utusan Borneo, kemari.
Ensanus, bepelasarka sebengkah portal berita Menteri Pelajar Malaysia Dr Maszlee Malik ba sebengkah pengerami di Nilai, madahka perambu NUTP ngambika warden sekula dichiri ba raban ukai pengajar patut dialuska dulu.
Maszlee madahka sida (KPM) tebuka runding sereta deka minta Bagi Pengurusan Sekolah Harian (BPSH) bejalaika randau enggau gempung gerempung nya.
“Engka sida bisi beberapa perambu ti nuju ngagai pekara nya,” ku Maszlee.