MUKAH: Perintah Gabungan Parti Sarawak (GPS) udah bisi empat batang polisi dikena nempa Sarawak nyadi nengeri ke pemadu maju nengah Atur Pemansang Malaysia Lumpar Ke-12.
Kepala Menteri Datuk Patinggi Abang Johari Tun Abang Openg madahka empat batang polisi nya nyengkaum pemansang betanam betupi moden enggau infrastruktur pemansang dagang temuai enggau infrastruktur iya, infrastruktur baka jalai alun,bekal ai enggau jematan sereta pelajar ari sukut latih pengelandik.
“Tu mih empat batang sektor dalam RMK Ke-12 lalu GPS udah bisi polisi tu dikena mai Sarawak nyingkang maju ke mua,” ku iya lebuh bejaku ba pengerami Begulai enggau Rayat ke diatur ba Dewan Suarah Mukah kena malam Hari Dua tu tadi.
Iya mega madah ba pemansang ekonomi,nengeri deka fokus ngagai ekonomi digital.
Nya kebuah, Sarawak deka bisi internet ti ngembuan peneras 5G enda lama agi, ku iya.
“Dalam RMK Ke-12, aku deka beratka peneras internet 5G,” ku iya.
Iya madah, bala ketuai GPS deka seruran begulai enggau rayat lalu mendingka sada sida sereta nyendiaka utai ti diguna rayat.
“Kami deka ke polisi kitai efisyen lalu nentuka kami ulih nyendiaka utai ti diguna rayat,” ku iya.
Sama bisi ngulu pengerami nya Sapit Kepala Menteri Datuk Amar Douglas Uggah Embas, Menteri Kaunsil Kandang Menua Datuk Dr Sim Kui Hian Menteri Pengintu Pengelantang Pendiau Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah, Menteri Dagang Temuai, Seni, Adat Nembiak enggau Main Abdul Karim Rahman Hamzah enggau ADUN Tellian, Yussibnosh Balo.