Anda di sini

Raban SIDS meseti nyikap diri napi transformasyen digital: Masing

Advertisement
 John Sikie (tengah) disempulang raban SIDS ke bukai melah kek ngelai Pengerami Ngintu Penumbuh Ke-30 Taun SIDS Sibu ba Kingwood Hotel ditu, malam ensana.
NGARAP SEMAMPAI MUJUR: John Sikie (tengah) disempulang raban SIDS ke bukai melah kek ngelai Pengerami Ngintu Penumbuh Ke-30 Taun SIDS Sibu ba Kingwood Hotel ditu, malam ensana.

SIBU: Raban Sarakup Indu Dayak Sarawak (SIDS) di menua pesisir ditangkan nyikap diri beambi ulih ari transformasyen digital ke ditumbuh perintah nengeri.

Sapit Kepala Menteri Datuk Amar Dr James Jemut Masing madah, pengawa perintah nya bela mai pangka ke besai ngubah semua bengkah pemansang nyengkaum ba pengidup indu Dayak.

“SIDS udah nyengenda mai pemujur ke positif ngagai komuniti indu Dayak ti bela nyungkak tikas pengidup bala anak, ruang bilik sereta mensia mayuh ke bukai.

“Kitai udah nentuka indu Dayak enda kelalu jauh tinggal ba belakang pemandang besai ke diatur perintah nengah program digaga kita.

“Nya alai, ngarapka raban tu bela nyikap diri enda tinggal ari program pemansang transformasyen digital perintah nengeri,” pia ku iya madah maya Pengerami Ngintu Penumbuh Ke-30 Taun SIDS Sibu ba Kingwood Hotel ditu, malam ensana.

Teks jaku iya dibacha Menteri Muda Undang-undang enggau Adat Bumiputera Datuk John Sikie Tayai.

Sama bela datai maya tu iya nya Sekretari Mendam Opis Menteri Utiliti ti mega Chairperson SIDS, Datuk Ir Alice Jawan, Sekretari Politik Daniel Bujal, Mandal Presiden Gerempung Dayak Sarawak (SDNU) Chambai Lindong, Chairperson SIDS Sibu Anglyn Uchi Maseng enggau chairperson komiti pengatur pengawa Tuai Rumah Monica Giri.

Maya pengerami tu mega tiga iku ex-chairperson SIDS pampang Sibu bisi datai Nancy Sudan, Rosely Umbau enggau Sandra Suda Ambas.

Nambahka jaku iya, Masing madah, perintah semampai ngadu pelin enggau polisi ngemeratka pemansang orang indu dudi hari.

“Kitai endang ngemeranka pengawa ngangkatka tikas pemansang orang indu Dayak nyengkaum ba pekara ekonomi,” ku iya madah baru.

Kelimpah ari nya, iya mega ngansak raban SIDS naka alah ngemansangka diri lebih agi meras nyengulaka anak.

Iya pechaya sepengudah Alice Jawan mangku pengawa nyadi chairperson, Alice nadai bepenanggul megai sereta mai penemu ngagai bala raban ti deka nyadika peransang ngagai sida mujur ba ekonomi sereta nyengulaka anak.

Ba pengerami nya, komiti pengatur bisi nyuaka peransang pelajar ngagai bala nembiak ke mujur peresa sereta bisi nyuaka Anugerah Ibu Berjaya.

Advertisement