Anda di sini

Raban SIDS dipinta chakah agi nambah penyampau kaban nyereta serakup nya

 John Sikie ngarika Masing bejadi Pengerami Ngintu Penumbuh Ke-30 Taun SIDS Sibu di Sibu, malam ensana. Bela ayan Alice (empat kiba) sereta bala bukai.
BEJADI: John Sikie ngarika Masing bejadi Pengerami Ngintu Penumbuh Ke-30 Taun SIDS Sibu di Sibu, malam ensana. Bela ayan Alice (empat kiba) sereta bala bukai.

SIBU: Sarakup Indu Dayak Sarawak (SIDS) semampai diansak nambahka penyampau raban sida dikena ngenegapka agi serakup nya.

Chairman SIDS Datuk Ir Alice Jawan madah, ke diatu SIDS bisi lebih kurang 14,000 iku raban enggau 28 iti pampang serata nengeri Sarawak.

“Taja pia kitai endang sigi ngansak nambah tubuh kaban enggau nambah penyampau pampang serakup ngambika serakup tumajak kering.

“Ba jeman diatu kitai indu Iban tauka Dayak dalam serakup meseti ngemeratka pemansang diri nengah tuju penumbuh enggau visyen SIDS,” pia ku iya madah  maya Pengerami Ngintu Penumbuh Ke-30 Taun SIDS Sibu ba Kingwood Hotel ditu, malam ensana.

Pengerami tu dipenyadi Sapit Kepala Menteri Datuk Amar Dr James Jemut Masing ti diarika Menteri Muda Undang-undang enggau Adat Bumiputera Datuk John Sikie Tayai.

Nambahka jaku iya, Alice ti mega Sekretari Mendam Opis Menteri Utiliti madah, sekumbang ke ditumbuh 62 taun ke udah, SIDS udah dipegai beberapa iku tuai ti tau bendar nyadika chunto bala raban.

“Tuai kitai baka Barbara Bay ditangkan Tra Zhender (Dato Sri) enggau Tan Sri Empiang Jabu endang orang ke beberita.

“Ari sida serakup majak dikelala sereta dipebasa.

“Nya alai, ari tu semua kitai patut beratika nama tuju enggau visi serakup,” ku iya madah baru.

Kelimpah ari nya, Alice madah, ubah pemansang dunya diatu randaka raban sida ngemanahka agi chara bejadika juluk penumbuh SIDS.

“SIDS benung nyingkang ngagai ubah baru sereta ngangkatka diri nyadi gerempung indu Dayak ke bepenemu, landik sereta bepelajar.

“Kitai ulih meda semua pampang endang sigi mai bala sida ke biak nyadi raban,” pia ku iya.

Alice madah, perintah nengeri mega semampai nyukung pengawa sida nengah bantu ke diberi laban perintah pechayaka sida ulih ngemansangka indu Iban tauka Dayak.

Ba pengerami tu, Masing ngungkupka RM15,000 ngagai SIDS Pampang Sibu kelimpah John Sikie maya nya mega bela meri RM10,000.

Bela datai maya tu iya nya bini John Sikie iya nya Melia Gelen, Sekretari Politik Kepala Menteri Daniel Bujal, Mandal Presiden Gerempung Dayak Sarawak (SDNU) ti mega Chairman SDNU Pampang Sibu Chambai Lindong, Chairperson SIDS Sibu Anglyn Uchi Maseng enggau chairperson komiti pengatur pengawa Tuai Rumah Monica Giri.