Anda di sini

PSB komited agenda pemansang terus dipejalai

 Micheal nunjukka gaya kaki jematan ke baru tembu ti beungkus RM100,000 ba Sebangkoi, Betong ensanus.
JEMATAN BARU: Micheal nunjukka gaya kaki jematan ke baru tembu ti beungkus RM100,000 ba Sebangkoi, Betong ensanus.

BETONG: Parti Sarawak Bersatu (PSB) komited bejalaika agenda pemansang kelebih agi bekaul hak bansa Dayak di nengeri tu.

Kaban Kunsil Nengeri (ADUN) Engkelili Dr Johnical Rayong Ngipa nyemetak madah taja nadai agi dalam perintah, tanggungpengawa ngenegap enggau ngetanka hak rayat lebih agi di menua pesisir enda kala putus.

“Kami nemu nasit ukai selama iya jai munyi ku sempama ‘ibarat matahari lambat laun akan terbit dan besinar gah’...Pia mega enggau PSB tu,” ku iya seraya madahka tanggungpengawa meruan dipejalaika taja bisi kurang kelebih agi ari sukut agih belanja MRP enggau RTP.

 Iya madah munyi nya lebuh bejaku maya pengerami bejadi jematan baru enggau pengerami merarau di Rumah Micheal Peter Willie, Sebangkoi, Skrang ensanus.

Ku iya, iya ngarap rayat di semua kandang menua ke diarika PSB nyengkaum Engkilili ngambika nemu sida enda meri agih belanja baka ke udah sepengudah iya dirampas ari iya enggau kaban iya.

“Sida deka ngukum kami laban dikumbai kami enda sepenemu...Tang sida neju kami ngaga pemutus tu ungkup rayat ke milih kami,” ku iya.

Taja pia, Dr Rayong chukup siru laban penyukung iya nemu penanggul ti datai ari perintah ke diatu lalu ngarap rayat bediri tegap ba belakang semua pengari rayat enggau sida ti nyadi chalun PSB maya Pengawa Bepilih Nengeri (PRN) ti deka datai.

“Kami optimis pengundi bediri tegap ba belakang parti ba baruh pegai Dato Sri Wong Soon Koh sereta bala kaban enggau pengundi di serata nengeri,” ku iya.

Ku iya, juluk dipejalaika PSB enda ngetu ngapa taja geran MRP enggau RTP lebih agi bekaul tanah NCR ke semak amat ba ati bansa Dayak, peluang gawa ke enda setipak sereta penanggul nadai bulih  gawa ke nadai pemujur diputarka.

Kelimpah ari nya, sida komited deka berandau sentang kuasa imigresyen Sarawak, Undang-undang kanun tanah Sarawak, Sempekat Malaysia 1963, minyak enggau gis 1957 sereta infrastruktur ti kurang di menua pesisir.

Dr Rayong ke mega Ketuai Raban Nembiak parti nya ngansak rayat Sarawak nyereta nyadi kaban parti nya kelebih agi rebak biak laban PSB sebuah parti pupu raban bansa lalu ukai sebagi ari parti GPS enggau PH.

“Pechaya mih...Peminta kita didinga enggau kami lantang ati nerima bemacham penemu enggau pengandal sebuah perintah ti baru, beresi lalu barang bagi belanja deka tumbuh udah tu,” ku iya.

Bisi mega datai ba pengerami tu nya Penghulu Betuk Tubi, bala tuai rumah, pengereja pengawa perintah sereta komuniti kandang menua Lidong, Skrang Ili, Skim Skrang, Tisak, Tembong enggau Kubal.