Anda di sini

Apai indai, pengajar besaup mantu dalam pelajar sekula anak

BINTULU: Bala pengajar enggau apai indai bisi tanggungpengawa ti beguna amat dalam nyaup bala anak sida mujur ba renggat pelajar tumu.

Pemesai Opis Pengintu Pengelantang Raban Bansa (JKM) Bagi Menua Bintulu Taddy Ajin madah, dalam pekara tu apai indai patut besaup enggau bala pengajar ngambika pengawa ngajar anak sida nadai penanggul.

“Apai indai anang mudah nyima lebuh bala anak sida diukum pengajar,” ku iya bejaku maya Program Peransang Palan Aktiviti Nembiak Mit (PAKK) Bintulu begulai enggau Pengajar Emmet di SMA-TEGAS Digital Innovation Hub, Naim Paragon Bintulu Street Mall kemari.

Ku iya, apai indai patut berunding enggau memanah sebedau bejalaika pengawa. Iya nerang perintah nengah JKM udah merambu program ke manah dikena ngenegapka institusyen diri sebilik di menua tu.

Nya kebuah ku iya, program peransang begulai enggau pengajar Emmet nya entara pengawa ngagai juluk nya. Pengajar Emmet tauka nama kebendar iya Ahmad Faizal Osman nya anak asal Teluk intan Perak. Iya pengajar di Sekula Primari (SK) Pulau Seduku lalu udah megai pangku pengawa pengelama 20 taun di Sarawak.

Iya mayuh ngarang sentang peneleba iya di nengeri tu ba dalam blog iya ‘Cikgu Emmet Menulis’ ungkup ke dikena bekunsi bala mayuh.

Bisi mega datai iya nya Pemesai Pemansang Raban Bansa Catherine Machop, Chairman PAKK Bintulu Janudin Ab Rahman, Penumbuh PAKK Bintulu FarizahTudin, Eksekutif Komuniti enggau Aktiviti SMA-TEGAS Digital Innovation Hub Noor Shakinah Asniza binti Mortadza, kaban komiti PAKK,40 nembiak enggau apai indai.