Anda di sini

Nembiak sekula patut disikap enggau penemu teknologi moden

 Dr Annuar (bediri tengah) ngemata Dr Ahmad (duduk, dua ari kiba) enggau Tiong (duduk, dua kanan) bela betukar MoU, lalu dikemataka bala bukai.
BETUKAR SEMPEKAT: Dr Annuar (bediri tengah) ngemata Dr Ahmad (duduk, dua ari kiba) enggau Tiong (duduk, dua kanan) bela betukar MoU, lalu dikemataka bala bukai.

SIBU: Menteri Muda Pelajar enggau Pansik Teknologi Dr Annuar Rapa’ee nyambut manah inisiatif digital Sains, Teknologi, Kejuruteraan enggau Matematik (STEM) sereta ‘Digital Makerspace’ ti ditumbuhka Woodlands International School (WInS).

Ku iya, pengawa nya ulih meransang mayuh agi nembiak ngambi bidang Sains dudi hari ila.

“Beguna amat ba nembiak sekula disikap enggau penemu teknologi moden ngambika sida ulih besemekih enggau orang bukai lebuh bidang nya diguna amat.

“Menua kitai begunaka mayuh agi graduet dalam bidang injiniring enggau sains komputer dikena nampung peminta ke majak mayuh. Tu mandangka nama kebuah subjek Matematik enggau Sains patut dalam Jaku Inggeris,” ku iya lebuh bejaku bejadi Hari Tebuka Wins ditu, kemari.

Bisi mega datai nya Timbalan Naib Canselor UNIMAS Prof Dr Ahmad Hata Rasit, Ketuai Pemesai Operasyen WInS Charles Tiong, Principal WInS Aubrey Groves enggau Kaban Opis Direktor WInS Tiong Chiong Hee.

Ba pengerami nya mega, Dr Annuar ke mega Menteri Muda Pengawa Berumah enggau Pengerai Mensia Mayuh meda pengerami nyain MoU sentang inisiatif digital STEM enggau ‘Digital Makerspace’ entara UNIMAS enggau WInS.

Dr Annuar mega madah sentang nembiak ke masuk form 4 dalam bidang Sains enggau Matematik nunjukka penyampau nya nurun.

Ku iya, statistik ba taun 2014 mandangka semina 31.6 peratus aja nembiak ngambi bidang Sains enggau Matematik lalu penyampau nya majak nurun ngagai 19.7 peratus ba taun 2017.

“Taja bisi niki ngagai 23.2 peratus ba taun nyin kemari (2018), tang penyampau nya agi jauh ari tagit menua nya 60 peratus nembiak bidang Sains engggau Matematik lalu 40 peratus ungkup bidang Seni.

“Tang penyampau nya deka majak nurun udah sida datai ngagai palan pelajar tinggi. Tu pekara ke enda manah ungkup pemansang menua, laban kitai begunaka mayuh agi modal mensia ari pelajar ke ngambi STEM,” ku iya.

Tambah iya agi, Perintah Nengeri udah minta semua nembiak taun satu ngambi subjek Matematik enggau Sains dalam Jaku Inggeris berengkah taun baru tu ila.

Ku iya nerang, tu ukai pemutus ke mudah diambi Perintah Nengeri laban ke napi mayuh penanggul jaku timbal ari sukut postif enggau negatif.

“Tang, kitai patut ngambi pemar tu laban pengidup dudi hari nembiak kitai bepanggai ba guna nguasa Jaku Inggeris,” ku iya.

Berebak enggau nya, iya ngansak Wins ngambika ‘MakerSpace’ dibuka ngagai mensia mayuh ngambika penemu dikembuan sida dalam bidang STEM ulih dikunsi enggau bala nembiak bukai ke bisi di Sibu.