Anda di sini

CIDB deka ngadaka mayuh agi pengereja pengawa berumah profesional

 Baru (tiga kanan) meri setipikit basa ngagai Ahmad Naim Mohamad Rosli, nembiak ABM ti ngarika Malaysia ngagai World Skills 2019 Kazan nyerumba pengerami Jelajah TVET pengawa berumah di Kuching kemari.
MERI BASA: Baru (tiga kanan) meri setipikit basa ngagai Ahmad Naim Mohamad Rosli, nembiak ABM ti ngarika Malaysia ngagai World Skills 2019 Kazan nyerumba pengerami Jelajah TVET pengawa berumah di Kuching kemari.

KUCHING: Perintah nengah Kaunsil Pemansang Industri Pengawa Berumah Malaysia (CIDB) bisi juluk ngelatih mayuh agi pengereja pengawa ti ngembuan pengelandik dalam sektor pengawa berumah.

Menteri Kereja Raya, Baru Bian madahka sektor pengawa berumah menua diatu agi bepanggai ngagai pengereja pengawa menua luar ti meri ngagai pemansut belanja menua.

Dipelabaka sepenyampau RM5 bilion mata duit Malaysia udah dipelanja setaun dikena mayar gaji pengereja pengawa menua luar sepenyampau 420,000 dalam sektor pengawa berumah ti berejista enggau CIDB.

Nya alai perintah ku Baru, enggai bepanggai ngagai pengereja pengawa menua luar lalu deka ngelatih mayuh agi pengereja pengawa bepengelandik menua tu dalam sektor pengawa berumah.

“Runding orang biak ti kereja dalam sektor pengawa berumah madahka bidang tu enda likun, kamah enggau tusah.

“Tang diatu kitai udah berubah ngagai Revolusi Industri 4.0 lalu semua semua kereja dalam kandang endur ti bisi aircond.

“Lalu tebal agi pengereja pengawa bepengelandik dalam bidang pengawa berumah baka deriba kren dibayar enggau gaji ti tinggi agi dibandingka enggau raban profesional.

“Nya alai aku ngarapka orang biak kelebih agi nembiak Sarawak deka nitihka kus enggau latih dalam bidang pengawa berumah ti dipejalaika CIDB enggau nadai bebayar ba Akademi Binaan Malaysia (ABM),” ku iya.

Iya madahka pekara nya dalam aum pemberita pengudah bejadika Jelajah Pendidikan dan Latihan Teknikal dan Vokasional (TVET) pengawa berumah di Pusat Konvensyen CIDB Sarawak ditu, kemari.

Dulu ari nya lebuh bejaku ba pengerami nya, Baru madah kenyau taun 2015, CIDB udah ngubah landskap latih ba ABM dikena mekuh ngagai latih dalam bidang bepengelandik ti betikas tinggi.

Bidang betikas tinggi tu ku iya, iya nya bidang ti bisi peminta tinggi dalam industi kelimpah nerima bayar enggau penatai pemisi ti tinggi.

“CIDB ngungkupka belanja besai RM700 juta ninting taun dikena bejalaika program pemansang pekereja penaga berumah enggau nembiak ba ABM dibandingka enggau program bukai.

“Chara ti dipejalaika CIDB tu udah tentu bisi potensial narit pengerindu lebih mayuh nembiak menua tu ngambika milih kereja dalam industri pengawa berumah kelebih agi numbuhka program TVET pengawa berumah tu,” ku iya.

Kelimpah ari nya, Ketuai Eksekutif CIDB, Dato Ir Ahmad Asri Abdul Hamid madahka program Jelajah TVET pengawa berumah iya nya ti keterubah diatur berengkah di Kuching sereta udah nya di Terengganu enggau Pahang.

Program tu iya nya pengawa dipejalaika begulai CIDM enggau Opis Menteri Kereja Raya (KKR) dikena meri peransang ngagai nembiak di menua tu dalam bidang pengelandik pengawa berumah.

Sama bisi datai, Sapit Ketuai Sekretari (Pengatur) KKR, Dato Dr Ong Gua Pak, Direktor CIDB Sarawak, Mohd Merzan Hashim enggau Ketua Pegawai Operasi ABM Sarawak, Abdul Rahman Ahmad.