Anda di sini

Besaup enggau NGO mantu bansa Iban ke berumah ba tanah ti enda dikemendarka di mengeri tu

Advertisement
 Petrus ngarika Uggah bejadi AGM Pemaik.
BEJADI: Petrus ngarika Uggah bejadi AGM Pemaik.

KUCHING: Gerempung Ketuai Komuniti Iban (Pemaik) di mengeri Kuching dipinta bekerejasama enggau gerempung ukai dikuasa perintah (NGO) ke bisi ati deka mantu bansa Iban ke berumah ba tanah ti enda dikemendarka di mengeri tu.

Penanggul ke ditapi raban nya di mengeri tu baka ndai kereja sereta nadai perengkaguna ke chukup.

Sapit Kepala Menteri, Datuk Amar Douglas Uggah madah munyi tu lebuh ke bejadi Aum Besai Ninting Taun Pemaik Ke-4 ensanus.

Uggah ke mega Pemaik nyadi patron pengerami nya diarika sekretari politik Kepala Menteri, Petrus Igat Mathias ke macha teks jaku Uggah.

“NGO bisi sekeda program dikena mantu. Kerejaasma enggau kaul ke baka patut diguna sereta diintu.”

Uggah mega ngelalau Pemaik ngambika bekerejasama manah enggau Opis Pelilih Menua.  

“Kitai begunaka bantu perintah ngiga chara mutarka penanggul tu,” ku iya.

Uggah ke mega Menteri Betanam Betupi, Tanah Adat enggau Pemansang Kandang Menua gaga ati nemu gerempung nya mega ngereja pengawa sida mantu ngintu adat enggau tradisyen Iban kelimpah nyadi jematan entara perintah enggau komuniti.  

“Ketuai Pemaik tau ngerembaika bemacham polisi enggau program perintah ngagai komuniti ti ngembuan tuju dikena nyungkak kualiti pengidup sida.”

“Nya alai aku ngarapka AGM enggau pengawa milih komiti baru, ulih netapka kuing Pemaik jemah ila enggau program transformasyen ke manah agi.”

“Sida tetap engkeman ti diaku enggau dipebasa sereta nyadi referan ba Iban Adat, budaya enggau tradisyen,” ku iya.

Dulu ari nya, ba jaku Chairman Pemaik Penghulu Gunting Hiang madahka iya bisi perambu ngambika gerempung dilanchar enggau ba bulan November taun tu.

Gerempung nya bisi siku Pemancha, tujuh iku Penghulu enggau 14 iku ketuai genturung pendiau.

Lebuh ke dikerandau pengudah nya, Petrus Igat madahka bisi 259 iku ari 63 ruang bilik udah dikelala berumah ba tanah ti enda dikemendarka ba Jalai Chawan ditu.

Plot enggau tanah nyengkaum pendam nya, diempu Gerempung Bansa Dayak Sarawak, ku iya.

“Kami aku berandau enggau sida (orang ke berumah ba tanah ti enda dikemendarka) kelimpah berandau enggau perintah nengeri ngambika mantu mindahka sida tu ngagai palan pengentap baru.”

Sama bisi ngulu pengerami nya ketuai komuniti Iban Kuching, Temenggong Datuk Bernard Agan enggau leader Pemancha John Tambi.

Advertisement