Anda di sini

Servis Feri Muara Lassa diketu enda lama kemari ketegal sebun asap ti balat

 Gaya dalam feri Muara Lassa ti sekut sepengudah servis nya dibuka baru berengkah pukul 9 pagi kemari.
SEKUT: Gaya dalam feri Muara Lassa ti sekut sepengudah servis nya dibuka baru berengkah pukul 9 pagi kemari.

DARO: Servis Feri Muara Lassa diketuka enda lama pagi kemari berindik ari gaya sebun asap ti majak jai ke udah meri penanggul ngagai tikas penyauh pandang operator feri.

Pengawa ngetuka enda lama servis feri nya ti berengkah ari pukul 6 pagi iya nya ketegal faktor pengelikun sepengudah ngasaika tikas pandang ti enda jauh.

Tu udah ngujungka urung 100 buah perengka pengangkut bebaris panjai nganti servis feri nya disambung baru.

Taja pia, servis feri dibuka baru ngagai mensia mayuh berengkah pukul 9 pagi, sepengudah kandang tasik majak terang lalu ulih dipeda.

Hasnah Meraie, 45, ari Matu madahka servis feri ti diketu nya udah ngujungka mensia mayuh ke ngena servis nya nganti sepengelama tiga jam.

“Maya pagi tu, mayuh perengka pengangkut ngena feri laban ti hari bekereja. Sida bebaris panjai nganti servis feri nya dibuka baru,” ku iya nerang ngagai pemberita kemari.

Aisyah Amir, 36, ari Daro madahka, gaya sebun asap ti tebal pagi tadi udah ngujungka kandang tasik enda tentu ulih dipeda.

“Lebuh aku ti mansang deriba ke palan gawa pagi tadi, jalai enda tentu ulih dipeda laban sebun asap ti tebal. Taja pia, sepengudah pukul 12 tengahari tadi, sebun asap di Daro bisi kurang mimit lalu tikas penyauh pandang ulih dipeda,” ku iya.

Othman Nyadok, 66, ke udah pinchin ari Opis Kereja Raya (JKR) madahka iya milih diau di rumah aja maya musim sebun asap tu.

Ku iya nambah, aktiviti ba luar patut dikurangka maya musim sebun asap tu laban nya enda manahka pengerai.

“Maya hari biasa, aku suah pansut ari rumah, tang maya musim sebun asap tu aku ngurangka aktiviti ba luar,” ku iya nerang.

Rosita Joari, 42, ari Kampung Semop mega udah madah, sebun asap tu bisi kurang enti dibanding enggau pagi tadi (kemari).

Ku iya, sekula di kandang menua daro mega udah ditutup seharitu berindik ari gaya sebun asap ke udah nyadi di pelilih nya.

“Gaya sebun asap ti nyadi tu udah nekul pengawa kitai semua,” ku iya.

Mohamad Bahari, 59, ari Kampung Nangar Daro madah, gaya sebun asap ti nyadi tu udah ngeruga semua peranak di kandang menua tu bejalaika pengawa kelebih agi ungkup sida ti bekereja ba luar enggau ba kandang endur ti tebuka.

“Sebun asap tu udah ngenusahka kitai semua ngereja pengawa luar, tu nyengkaum ngirup ba pak kupi tauka palan ti nadai ‘aircond’,” ku iya.

Iya mega ngarapka raban ari ejensi perintah ti bekaul ulih ngaga pengawa menih remang dikena ngurangka agi gaya sebun asap ti udah nyadi di nengeri tu.