KUCHING: Perintah nengeri bejalaika semua chara ke patut dikena mutarka penanggul sebun asap enggau suntuk bekal ai di Sri Aman enggau lengkas.
Sapit Kepala Menteri, Datuk Amar Douglas Uggah madahka berindik ari pekara nya semua ejensi ari baruh Komiti Mutarka Penusah Ngenyit Nengeri Sarawak (JPBNS) ngambika bekerejasama ngurangka dua penanggul nya di Sri Aman.
"Ba Sri Aman bisi chairman komiti mutarka penusah ngenyit bagi menua ti minta semua ejensi baka soldadu, polis, Pasukan Gerakan Am (PGA), Angkatan Pertahanan Malaysia (APM) ngambika bekerejsama laban enti semina ngarapka Opis Bomba enggau Penyelamat Malaysia (Bomba) nya enda chukup.
"Kelimpah ari betapi enggau penanggul sebun asap, peranak Sri Aman mega betapi enggau penanggul suntuk ai.
"Nya alai diatu kitai bejalaika semua chara ke patut dikena nentuka isu suntuk bekal ai ulih dikurangka," ku Uggah ti mega chaiman JPBNS lebuh dikerandau raban pemberita pengudah licha operasyen menih remang ba Pangkalan Udara TUDM ditu sehari tu.
Dulu ari nya Uggah lebuh ti ngenang bekaul enggau operasyen menih remang madahka berengkah sehari tu nyentuk 22 September tu bilun Hercules C-130 ti dikeempu Soldadu Langit (TUDM) deka menih remang ba sekeda bagi menua di nengeri tu.
"Seharitu bilun HC130 deka berengkah bejalaika operasyen menih remang. Operasyen tu dipejalaika beperingkat nyentuk 22 September, ti berengkah ari Kuching - Samarahan -Serian-Sri Aman- Betong-Saratok-Sarikei-Kanowit-Sibu-Mukah-Sematan enggau Lundu.
"Kitai ngarapka pengawa menih remang tu mujur tang taja pia semua tu bepanggai ngagai gaya remang, sekalika bisi tauka nadai remang," ku iya.
Pengawa nunyau ai garam deka dipejalaika urung pukul 11.30 pagi sehari tu sebedau bilun HC130 bejalaika operasyen dipelabaka lemai tu.
Bisi datai nyempulang Uggah, Sapit Direktor Opis Pengemata Gaya Hari Sarawak Siniarovina Urban Sinyaw enggau Sekretariat JPBNS Mejar Ismail Mahedin.