Anda di sini

Pengerembai industri dagang temuai di Sibu napi penanggul

 (Ari empat kiba) Ik Pahon begulai enggau Siaw bejadika BASE Jump 2019 seraya dikemata Wong (tiga kiba).
BEJADI: (Ari empat kiba) Ik Pahon begulai enggau Siaw bejadika BASE Jump 2019 seraya dikemata Wong (tiga kiba).

SIBU: Pengerembai industri dagang temuai di kandang menua tengah Sarawak napi penanggul berindik ari kurang aksesibiliti kelebih agi ti ngaul penerebai antarabansa terus ke Sibu.

Sapit Sekretari Perintah Nengeri (Transformasyen Menua Pesisir) Ik Pahon Joyik madah, Sibu ngembuan mayuh penyelai ti ulih matak temuai ke ulih dipandangka ngagai dunya.

“Taja pia, pengerembai industri dagang temuai di kandang menua tu napi penanggul ketegal ti kurang aksesibiliti.

“Perintah nengeri nemu pekara tu lalu kitai patut ngaul Sibu enggau palan bukai di dunya,” ku iya lebuh ti bejaku maya Pengerami Bejadi Sibu International BASE Jump 2019 sereta Night Ride ba Dataran Tun Tuanku Bujang Fasa 2 malam ensana.

Sama bisi datai iya nya Residen Bagi Menua Sibu Charles Siaw, Sapit Residen Sibu Wong Hee Sieng, Presiden Gerempung BASE Malaysia Kapten A. Aziz Ahmad, Menijer Operasyen Farley Sibu Eijing Lau, pesereta BASE Jump sereta sida ke bukai.

Nitih ku Ik Pahon, perintah endang ngelaluka sebarang penerebai antarabansa ke Sibu.

“Nyambung Sibu terus enggau dunya luar ukai semina deka ngangkatka industri dagang temuai tang meri empas ngagai sektor ekonomi di bagi menua tu,” ku iya nerang.

Bejaku bekaul BASE Jump ke diatur kenyau ari taun 2009, iya madah tu program ninting taun ti mai tuju deka ngelakuka Sibu nyadi palan lumba enggau main ekstrem.

Kelimpah ari nya, ku iya, program nya mega dikena mandangka mayuh palan ti manah sereta ngelakuka Sibu ti nyadi pintu penama ngagai kandang menua tengah Sarawak.

“Program nya mega deka nyungkak penatai pemisi ungkup sida ti bedagang ba kandang menua tu maya karnival dagang ti diatur beserimbai enggau BASE Jump 2019,” ku Ik Pahon.

Beserimbai enggau nya, Siaw ba jaku iya ngarapka mayuh agi penerebai bilun terus ke Sibu bisi digaga taun nyin ila dikena ngelakuka mengeri tu sereta ngangkatka aktiviti ekonomi kandang menua nya.

Nitih ku Siaw, semina enggau chara tu aja ulih mantu ngangkatka ekonomi lalu mantu orang dagang di kandang menua tu ditu.

“Sibu ngembuan mayuh potensial ti ulih dikemansang kelebih agi ari sukut ekonomi laban nya bepalan ba tengah Sarawak. Sibu mega nyadi pintu penama ke Kapit, Mukah, Sarikei enggau Betong,” ku iya nerang.