KUCHING: Komiti Akaun Awam (PAC) chakah bejalaika pengawa enggau tanggungpengawa dalam sistem demokrasi dikena ‘check and balance’ eksekutif enggau raban perintah.
Chairman PAC Sarawak Aidel Lariwoo madah, nya dikena nentuka duit rayat dibelanja enggau manah sereta meri penguntung ngagai rayat.
“PAC deka meda tauka nentuka duit rayat dikena enggau efisyen, efektif sereta ngelimat kelimpah ari elemen menyati enggau dikurangka tauka manah agi dipunaska semua.
“Perambu PAC deka dipejuraika enggau tuju bidang kuasa enggau timbal ari Kaban Kunsil Nengeri (ADUN) pengudah tembu,” ku iya dalam aum pengarang berita.
Dulu ari nya Aidel ti mega ADUN Sadong Jaya nyadi chairman Aum PAC Sarawak ke-53 ti diatur ba Kompleks Kunsil Nengeri ditu, kemari.
PAC Sarawak ke-53 baum dua hari (18 & 19 September), ti berandauka isu dalam Auditor General Audit report 2016 siri 1 enggau 2.
Ku iya, PAC ngagauka 25 opis menteri, opis, ejensi enggau Badan Berkanun ngambika sida nya meri penerang pasal isu audit ti dibantaika Ripot Ketuai Audit Menua (LKAN) ungkup taun 2016, taja pan tebal agi isu udah diputarka.
Nambahka nya komiti minta opis menteri, opis,ejensi enggau Opis Bekaul Perintah nganti isu dikemaru enggau nama ti deka dipejalaika dudi hari dikena nentuka pekara ti sama enda nyadi baru.
“Isu LKAN 2016 nya mungkur beberaka ejensi enggau opis baka bekal ai, Opis Kereja Raya, Opis Bekal Ai Menua Pesisir, Pengawa Berumah, Opis Kaunsil enggau ke bukai.
“Taja pan tebal agi semua isu ti dibantaika dalam ripot audit nya udah diputarka, tang aksyen ti dipejalaika sekeda ejensi nadai ngembuan konsep rega duit sereta enda nitihka asil ti ditagit.
“Nya alai PAC ngasaika sekeda ejensi, sida patut meda baru sekalika bejalaika pengawa, prosedur wang tauka operasyen ejensi.
“Semua ejensi enggau opis meri kerejasama ngagai kami (PAC), meri input tauka meri perambu dikena ngangkatka sistem tauka mendingka sekeda pengelemi,” ku iya.
Kelimpah ari nya iya madahka asil ripot PAC nya deka ti disadang tembu jung taun deka dibai ngagai aum kunsil nengeri ngambika bulih input tauka timbal ari ADUN.
“Sida (opis menteri, opis, ejensi enggau opis bekaul perintah) semina madahka pekara ti baru ngagai kami, meri perambu sereta keretas kereja dikena ngemanahka proses enggau sistem dikena nentuka semua duit dipelanja enggau manah,” ku iya.
Sama bisi ba aum pengarang berita nya kemari kaban PAC.