KUCHING: Jalai Besai Pan Borneo Utara Sdn Bhd (LBU) ngarapka projek Jalai Besai Pan Borneo deka tembu baka ti disemaya nyema pengawa nyadi nyadi kaban ngaga projek(rakan pelaksana projek)(PDP) ba projek tu diketuka.
LBU dalam penerang berita kemari, madahka nyadi profesional LBU pechaya udah ngereja bagi sida ba pengawa ngemansang, ngepun enggau ngamatka tanggungpengawa dalam projek tu nyentuk naka ke diatu udah setengah tembu.
Nya alai ku iya, nyema perintah deka ngambi laluh renggat ngaga, LBU enggau rayat Sarawak ngarapka perintah deka nembukka jalai alun tu nitihka ditimpuh, nitihka ungkus enggau standard kualiti sama sebaka enggau jalai Telok Melano - Sematan.
“LBU ti nyadi PDP temegah amat udah ngepunka pemansang Jalai Besai Pan Borneo Sarawak ti udah lama dianti rayat Sarawak.
“Aum deka ngetuka PDP disebut kenyau ari perintah ti berubah ba tengah taun 2018 sereta LBU melabaka nya enda diketuka pengudah ulih ngelimat RM2 bilion ti enggau nentuka kunteriktor tejapaika garis timpuh pemujur projek sida,”ku iya.
Nambahka nya dalam penerang berita nya, LBU gawa rat enggau perintah nengeri sereta perintah besai ba semua aspek gawaka projek berengkah ari langkar, perambu, ngatur, pengulih, matau pemansang, nentuka kualiti, ngaga bgunan dipasuk Bumiputera enggau ke bukai.
Nitihku LBU, Pemansang Fasa 1 Jalai Besai Pan Borneo Sarawak mungkur pengawa ngaga jalai dua tuju empat lurung sepemanjai 786 kilometer (KM) ari telok Melano ngagai Miri ti dibagi ngagai 11 pakej kereja.
Pakej kereja tu dipejalaika enggau kerejasama enda kurang ari 10 peratus kunteriktor menua tu ke alai tetiap pakej kereja entara 60km ngagai 95km, enggau batang jalai ti mungkur 115 jematan, 25 simpang, empang trafik, pal jalai, jematan pejalai kaki, endur ngetu, palan ngengkah kereta enggau bas.
Ungkus ba tetiap kilometer ungkup kereja ngaga jalai Jalai Besai Pan Borneo Sarawak dipelabaka sepenyampau RM15.95 juta, mungkur ngaga baru utiliti enggau penyikap jalai. Ungkus inklusif ngaga jematan enggau simpang ba tetiap kilometer dijangka RM19.36 juta.
Dikena nentuka penyereta minimum 30 peratus Bumiputera Sarawak dalam projek besai tu, LBU numbuhka Program Penyereta Bumiputera sereta udah ngelui tagit iya nya 32.34 peratus penyampau rega kontrak sama enggau RM5.2 bilion.
Naka 25 Ogos 2019, semua pemansang pakej kereja di atas semua 25 seksyen udah tejapaika 45 peratus enggau sekeda seksyen tejapaika entara 55 peratus ngagai 63 peratus pemansang.
Seksyen Jebatan Batang Rajang (Durin) ari baruh pakej kereja 7 di Sibu, udah manggai 87.2 peratus naka ujung bulan Ogos 2019.
Naka ujung bulan Ogos 2019, lebih 160km jalai dua tuju keterubah Jalai Besai Pan Borneo Sarawak udah tembu endur ngelimpangka trafik ngambika penguna jalai ulih deriba enggau lantang.
Lebuh datai ba ujung taun 2019, dipelabka 395km laluan keterubah deka dibuka ngagai penguna sereta berebak enggau tu kereja deka dipajakka dikena nembuka jalai kedua.
Ba LBU empu, aum tauka randau pasal ubah model pejalai projek ti udah ngeruga penyikar utai ke udah dilangkar enggau dipesetuju ulih perintah projek tu.
Pekara tu ngenyinuka laban semua penekul nya deka ngeruga semua pejalai ngaga jalai besai ti amat dianti rayat Sarawak.