Anda di sini

Latih Sibu International BASE Jump 2019 tetap dipejalai kemari

 Bala penerejun lebuh ti ngaga pengawa latih ba Dataran Tun Tuanku Bujang Fasa I ba Sibu.
DEKA DITERUSKA: Bala penerejun lebuh ti ngaga pengawa latih ba Dataran Tun Tuanku Bujang Fasa I ba Sibu.

SIBU: Taja besebun asap, pengawa latih terjun Sibu International BASE Jump 2019 diteruska ari atas begunan Wisma Sanyan ditu, kemari.

Residen Bagi Menua Sibu Charles Siaw madah, taja pan gaya hari ti besebun asap penangkup mua enggau mulut bisi disediaka komiti pengatur ngagai 13 iku penerejun ti ngambi bagi dalam aktiviti tu.

Pengawa latih nya berengkah dipejalai ari pukul 8 pagi nyentukka 1 ngalih hari.

“Naka ke diatu, bilik operasyen bedau dipejalai agi,” ku iya lebuh ti ditanya bekaul sekalika pengawa latih nya diketuka nyema bacha Tikas Pengamah Angin (IPU) nya datai ba tikas 200.

Bacha IPU ditu kemari iya nya 246 naka pukul 2 lemai kemari.

Nyadika rikod, bacha IPU 0 ngagai 50 dikumbai manahka pengerai, 51-100 (tengan), 101-200 (enda manahka pengerai), 201-300 (amat enda manah ke pengerai) lalu 301 ke atas (enda likun).

Siaw madah, aspek pengelikun pesereta BASE Jump nya endang dikemerat laban nya pengawa terjun ari begunan ke pemadu tinggi di Sarawak, Wisma Sanyan ti ngembuan peninggi 126 meter lalu pengawa nya deka dikemendar nyema gaya hari nadai penanggul.

Edisyen taun tu udah berengkah kena 13 September nyentukka 22 September tu ba Dataran Tun Tuanku Bujang Fasa I enggau mayuh macham aktiviti.

Program kebendar pengawa terjun tu deka berengkah kena seharitu (Hari Lima) ke alai sida deka dilepaska enggau rasmi Sapit Residen Bagi Menua Sibu Wong Hee Sieng kena pukul 7.45 pagi.

Sibu Internationa BASE Jump 2019 tu udah masuk edisyen ke-11 taun tu.

Program tu udah diatur Opis Residen Sibu enggau kerejasama Komiti Pekereja Dagang Temuai (DTTG) Bagi Menua Sibu enggau kaban strategik ti datai ari ejensi perintah, sektor peribit enggau Gerempung Ukai Dikuasa Perintah (NGO).