Anda di sini

700 iku peranak di Sibuti napi penanggul kurang bekal ai irup

LUKANISMAN
LUKANISMAN

MIRI: Lebih 700 iku peranak rumah panjai di Sibuti betapi enggau penanggul kurang bekal ai irup berindik ari musim kemarau ti panjai tu.

Kaban Parlimen (MP) Sibuti Lukanisman Awang Sauni madah, genturung pendiau tu iya nya kandang endur ti endang bepanggai penuh ba penatai ai ujan enggau sungai.

Entara genturung pendiau ti betapi enggau penanggul tu iya nya Rumah Agap di Niah, Rumah Ngayum di Bekenu, Rumah Lagan, Rumah Insin, Rumah Apin, Rumah Lani, Rumah James Biri, Rumah Banyan enggau Rumah Isan di kandang menua ulu Sibuti.

“Peranak di genturung pendiau tu udah besebana ngagai au lalu minta bekal ai irup ngambika dianjung enggau lengkas,” ku Lukanisman madah.

Kandang menua di ulu Sibuti udah balat napi penusah tu berindik ari ai sungai ti endang nyadi pun pemisi ai ke guna sida besehari-hari diatu majak langkang.

Kelimpah ari Palan Servis Komuniti Sibuti, peminta nya mega udah digaga ngagai Opis Pelilih Subis.

Kemari, palan servis nya udah nganjung 110 kutak ai mineral ngagai peranak di Rumah Insin laban sida ti begunaka nya enggau lengkas.

“Sebedau tu, kitai udah nganjung ai irup ngagai Rumah Banyang, Rumah Lagan, Rumah James Biri enggau Rumah Isa. Tang sida agi minta baru peminta nya ketegal tikas ai sungai di kandang menua sida majak langkang,” ku iya nerang.

Nitih ku Lukanisman agi, musim El Nino diatu mega udah meri empas ngagai bekal ai paip.

Sekeda genturung pendiau di Sibuti mega diripotka udah napi pengurang bekal ai paip laban ti sungai ke nyadi pun ai di Palan Meresi Ai kandang menua nya langkang.

“Kitai ngarap bekal ai irup terus dibekalka laban kitai enggai peranak di sitak tu dituntung penanggul pengerai laban ti ngirup ai ke enda beresi,” ku iya nyemetak.

Lukanisman minta kerejasama Opis Pengelantang Pendiau Komuniti (JKM) enggau Opis Pelilih dikena ngulihka bekal ai irup lalu diagihka ngagai genturung pendiau ti napi penusah tu.

Pia mega iya minta Opis Bekal Ai Menua Pesisir (JBALB) Miri ngambi mutarka penanggul tu enggau lengkas.

Ba kenang ke bukai, nitih ku ripot ari JKM, lebih 10,000 peranak menua pesisir ari lebh 100 genturung pendiau di bagi menua Miri napi penanggul bekal ai irup.

Nitih ku Jurujaku JKM Miri maya ti dikerandau pemberita madahaka lebih 78,000 kutak ai irup udah dianjung ngagai sida ti napi penanggul bekal ai irup tu.