Dikarang Rengenyan Labang
KUCHING: Sapit Kepala Menteri Datuk Amar Douglas Uggah Embas bebendar madah sebuah rumah panjai enda kala dirichika dua tuai rumah sereta pekara nya tetap enda nyadi.
Laban ku iya Sarawak bisi atur ke diri empu ba pengawa nyirika lebih agi ketuai pupu bansa sereta ketuai raban bansa.
Ku iya, Sapit Menteri Pemansang Menua Pesisir enggau Raban Bansa Sivarasa Rasiah patut nerang jaku iya bekaul enggau perintah besai deka nyirika tuai rumah, ketuai raban bansa enggau ketuai genturung pendiau di Sarawak ari raban Pakatan Harapan (PH).
"Aku enda nemu (reti ku iya), sida patut nerangka ngagai kitai.
"Tang nama ti dikeenggaika kitai nyadi iya nya dua tuai rumah ba sebuah rumah panjai. Tu enda kala nyadi sebedau tu, ngarapka enda nyadi barang maya," ku iya lebuh dikerandau raban pemberita pengudah tembu pengawa nyuaka chek duit bantu UNIFOR (Unit Pekara Jalai Pengarap Bukai) Taun 2019 (Fasa Keterubah) ti diatur ba Wisma Bapa Malaysia, ditu sehari tu.
Lebuh ti ngenang pasal Komiti Pemansang enggau Pengelikun Genturung Pendiau (JKKK) ti ditukar ngagai nama baru iya nya Majlis Pengurusan Komuniti Kampung (MPKK), Uggah madahka pekara nya berubah pengudah Pakatan Harapan (PH) nyadi perintah besai.
Uggah mega madahka perintah besai PH mega ngurangka penyampau bayar gaji tauka elawin ke diberi ngagai ketuai pupu bansa.
"MPKK iya nya nama baru dikena nganti JKKK. Nama ke nyadi maya PH megai perintah besai laban aku bisi dalam aum, Menteri Pemansang Menua Pesisir madah ngagai kitai iya nya perintah PH ngaga pemutus ngubah nama ngagai MPKK. Tanggunpengawa sama sereta struktur mega sama.
"Di Semenanjung sida (PH) mayar chairman enggau sekretari sereta sida mega ngaga pemutus ngurangka gaji tauka elawin chairman ari RM900 ngagai RM500.
"Aku mai pekara tu ngagai kabinet, lalu kabinet ngasaika kitai patut agi ngena JKKK, udah nya ake betemu baru enggau opis menteri nya sereta madahka sida iya nya nengeri kitai agi ngena JKKK lalu sida mega besetuju.
"Dalam timpuh ke sama mega kitai ngasaika enda patut ngurangka gaji tauka elewin (ketuai pupu bansa) ari RM900 ngagai RM500, nya alai Kepala Menteri Datuk Patinggi Abang Johari ngaga pemutus nambahka RM400, nya kebuah (gaji tauka elawin ketuai pupu bansa Sarawak) agi RM900," ku iya seraya madahka penyampau gaji dibayar ngagai ketuai pupu bansa iya nya ari perintah besai RM500 lalu dibayar perintah nengeri RM400.
Ku Uggah, Sarawak bisi dua struktur iya nya ketuai pupu bansa mungkur tuai rumah, kapitan enggau ketuai genturung pendiau ke nyadi chairman JKKK ba tiap genturung pendiau tauka rumah panjai.
Sarawak bisi siti agi struktur iya nya ketuai raban bansa ti mungkur penghulu, pemanca enggau temenggung lalu semua sida tu dibayar penuh ulih perintah nengeri, ku iya.
"Lebuh sapit menteri pemansang menua pesisir enggau raban bansa berengkah ngenyaruka semua pekara tu, nya kebuah aku madah iya temuai sereta enda nemu sistem kitai," ku iya.
Kelimpah ari nya lebuh ti ngenang sapit menteri nya ti madahka perintah Sarawak nulak duit dikena mayar gaji tauka elawin ketuai pupu bansa, Uggah bepenemu sapit menteri nya patut meresa fakta dulu sebedau ngeluarka seberang jaku.
"Sapit menteri nya madahka kitai enda nerima duit, aku ngasika manah iya meresa fakta, kitai enda kala nulak duit nya.
"Taja pan beberapa bulan nadai duit diberi ngagai kitai, kitai tetap mayar (gaji tauka elawin), udah nya baru sida meri duit, kitai terima kitai enda kala nulak. Aku ngasaika manah iya meresa pekara nya," ku iya.