KUCHING: Opis Pelajar Pelilih Menua (PPD) di serata bagi menua di nengeri tu dipinta matau gaya sebun asap.
Menteri Opis Pelajar Dr Maszlee Malik madah, nyema gaya sebun asap nya majak balat, prosedur operasyen standard (SOP) mesti dititihka lalu sekula ke napi penanggul nya patut ditutup.
“PPD dipinta matau silik agi gaya sebun asap di nengeri tu laban kitai deka nentuka pengelantang pendiau bala nembiak enggau pengajar sekula dikemeratka.
“Nyema sebun asap manggai ba ikas ti tau ngeruga pengerai, sida patut merintahka sekula ba kandang menua nya ditutup,” ku iya lebuh ditanya bekaul enggau IPU di Sri Aman ti ngerikod bacha ke tau ngeruga pengerai ensanus.
Iya bejaku munyi nya lebuh ke dikerandau media lebuh nemuai seraya kereja ngagai Sekolah Menengah Kebangsaan Sungai Tapang ditu, kemari.
Berebak enggau nya, nitihka padah ba website Opis Rampa Menua madahka Sri Aman ngerikod bacha IPU ti tau ngeruga pengerai enggau bacha 407 naka pukul 5 lemai kemari.
Di Kuching ngerikod kualiti angin pemadu kamah iya nya 214.
Tujuh agi menua ti ngerikod IPU kamah iya nya Miri (122), Samalaju (103), Bintulu (125), Mukah (127), Sibu (173), Sarikei (155) enggau Samarahan (158).
Di Limbang, ILP Miri enggau SK Kuala Baram ngerikod IPU jelan pemanah iya nya 77, 98 enggau 86.
Bacha IPU antara 0 nyentuk 50 dikategorika manah, 51 nyentuk 100 (sjelan pemanah), 101 nyentuk 200 (kamah), 201 nyentuk 300 (pemadu kamah), lalu 300 ke atas tau ngeruga pengerai.
Berebak enggau nya, Opis Pelajar Nengeri madahka 298 sekula ke alai 97 ari nya di Sri Aman ditutup kemari.