Anda di sini

Penyampau pekebun mit kediri ke bisi MSPO mengkang mimit

 Teresa (tengah) begambar enggau bala penanam sawit pengudah ‘Majlis Taklimat MSPO’ enggau ‘Sesi Dialog Bersama Penanam Sawit Sarawak’, kemari. — Gambar Chimon Upon
KE ALBUM: Teresa (tengah) begambar enggau bala penanam sawit pengudah ‘Majlis Taklimat MSPO’ enggau ‘Sesi Dialog Bersama Penanam Sawit Sarawak’, kemari. — Gambar Chimon Upon

KOTA SAMARAHAN: Penyampau pekebun mit kediri di Sarawak ti nanam sawit ke udah bisi setipikit Minyak Sawit Mampan Malaysia (MSPO) agi ba tikas ke chukup baruh.

Menteri Industri Besai Teresa Kok madahka, nya alai opis menteri begulai enggau ejensi baka Kaunsil Minyak Sawit Malaysia (MPOB) enggau Majlis Pensijilan Minyak Sawit Mampan Malaysia (MPOCC) benung chakah nambahka penyampau pekebun mit enggau pengemeran sawit nitihka prinsip ulih ngerembai sereta ba tikas ke manah setipikit MSPO.

Iya madahka pengawa ke benung chakah dipejalaika MPBO dikena nambahka penyereta pekebun mit kediri  iya nya nengah ‘Kelompok Minyak Sawit Mampan (SPOC)’ dikena nyapai semua pengemeran sawit bisi MSPO lebuh manggai 31 Disember 2019.

“Sarawak aja, bisi 22 ari 32 SPOC ke udah diberi setipikit MSPO. Tu mungkur 4,146 iku pekebun mit kediri enggau kandang endur ti pemesai 25,692 hektar.

“Taja pia pemesai ti diberi setipikit agi baruh iya nya semina 11 peratus ari 238,400 hektar penyampau pemesai kebun sawit pekebun mit kediri di nengeri Sarawak.

“Nya kebuah aku enggau bala opis menteri bejalai di serata nengeri betemu enggau pekebun mit enggau penanam sawit ngambika sida enggau lengkas ngulihka setipikit MSPO,” ku iya dalam aum pengarang berita seraya madahka nya naka 31 Julai 2019.

Dulu ari nya iya ngulu ‘Majlis Taklimat MSPO’ enggau ‘Sesi Dialog Bersama Penanam Sawit Sarawak’ ti diatur ba Dewan Suarah ditu, kemari.

Pekebun mit ti nyereta SPOC deka dibantu pemesai TUNAS maya bejalaika Chara Ngemeran Pengawa Betanam Betupu Ke Manah ungkup setipikit MSPO kebun sawit betumpuk.

Pengawa meri setipikit MSPO pekebun mit deka nyamin penyungkak produktiviti  enggau kualiti asil buah sawit ke lalu mai pemanah ngagai penyungkak penatai pemisi pekebun mit, ku iya.

“Entara kebuah pekebun mit enda mayuh bisi setipikit nya laban bisi sekeda nya nanam ba tanah ti enda dikemendarka, tauka bisi sekeda nya nanam ukai ba tanah diri.

“Nambahka nya bisi sekeda nanam sawit ba tanah ke patut endur nanam getah tauka padi. Kami nerima mayuh isu ti ngujungka sida enda bulih setipikit ari baruh MSPO,” ku iya nyaut lebuh ditanya kebuah pekebun mit ke bisi MSPO agi baruh.

Nitihku iya ba timpuh ke sama iya nya naka 31 Julai 2019, sepemesai 2.75 juta hektar tauka 47 peratus ari 5.85 juta hektar utai tanam sawit bisi bulih setipikit MSPO.

Ku iya nya pEengaa meri setipikit nya mungkur 2.35 juta hektar ladang enggau 403,000 hektar pekebun mit.

Kilang buah sawit ke udah bisi diberi setipikit MSPO bisi 271 buah kilang tauka 51 peratus ari penyampau semua kilang buah sawit di Malaysia, ku iya.

“Kelimpah ari nya, nyentuk 31 Julai 2019, 128 ari 162 SPOC di serata menua udah diberi setipikit  MSPO ti mungkur penyereta 14,400 pekebun mit kediri enggau pemesai kebun iya nya 56,400 hektar,” ku iya.

Kelimpah ari nya iya mega ngelalau pekebun sawit kelebih agi pekebun mit ngambika nanam mayuh macham utai tanam kelimpah ari nanam sawit, dikena nambahka penatai pemisi.

“Aku deka meri langgur penemu ngagai pekebun mit kitai iya nya patut nanam mayuh macam utai tanam anang semina nanam sawit aja tang patut nupi manuk, chapi, kambing tauka utai bukai dikena nambahka penatai pemsisi,” ku iya.

“kebendar kitai chukup meransang pekebun mit ngambika nanam mayuh macham utai tanam laban enti bisi tanah dua ngagai tuga ekar nya enda mayuh sereta enda untung enti ditanam sawit, nya kebuah patut nanam utai tanam ke bukai agi dikena nambahka penatai pemisi,” ku iya.