Anda di sini

Pemujur ngatur pengerami ngintu Hari Malaysia dipuji

 Tun Mahathir enggau bini iya, Tun Dr Siti Hasmah Mohd Ali; Kepala Menteri Datuk Patinggi Abang Johari Tun Openg enggau Kepala Menteri Sabah, Datuk Seri Mohd Shafie Apdal sereta temuai dipebasaka bukai ngitauka Jalur Gemilang sambutan Hari Malaysia 2019 di Stadium Perpaduan, Petra Jaya, kena malam Hari Satu tu tadi.
SAYAUKA MENUA: Tun Mahathir enggau bini iya, Tun Dr Siti Hasmah Mohd Ali; Kepala Menteri Datuk Patinggi Abang Johari Tun Openg enggau Kepala Menteri Sabah, Datuk Seri Mohd Shafie Apdal sereta temuai dipebasaka bukai ngitauka Jalur Gemilang sambutan Hari Malaysia 2019 di Stadium Perpaduan, Petra Jaya, kena malam Hari Satu tu tadi.

KUCHING: Menteri Besai Tun Dr Mahathir Mohamad muji pengerami ngintu Hari Malaysia di Sarawak taun tu.

Ku iya, taja pan gaya hari besebun asap, tang pengerami nya tetap richah.

“Taja pan diberi timpuh ke pandak, Perintah Sarawak ulih nusun baru sereta ngemujurka pengerami tu.

“Aku meri pengaga ati ngagai Datuk Amar Awang Tengah Ali Hasan (Sapit Kepala Menteri) ke mega menteri ti mangku tanggungpengawa ngatur pengerami tu enggau Gobind Singh Deo (Menteri Komunikasyen enggau Multimedia) sereta Perintah Sarawak ke udah meri kerejasama ti chukup manah ngemujurka pengerami tu,” ku iya.

Iya bejaku munyi nya lebuh dikerandau media pengudah pengerami ngintu Hari Malaysia 2019 di Stadium Perpaduan, Petra Jaya ditu, malam Hari Satu tu tadi.

Ku Tun Mahathir, pengerami nya besai amat reti laban ngelaika kitai ngerami hari numbuhka menua menua kitai Malaysia

”Diatu, menua kitai menua Malaysia lalu aku pechaya nengah pemandang enggau penyerakup ke dipandangka, Malaysia deka tegap sereta terus maju lalu ulih mansang nyentuk ke nyadi menua maju,” ku iya.

Berebak enggau nya, Awang Tengah lebuh ke dikerandau m adahka diri berasai gaga sereta temegah ati laban udah mujur ngatur pengerami nya.

Ku iya, sambut rayat mega manah amat nyentuk bisi sanggup bediri di luar meda pengerami ke nyadi di stadium tu.

“Terima kasih ngagai semua ke bisi enggau merindang.

“Tadi, Menteri Besai bisi madahka iya rindu endar meda main ti dipendangka iya nya Shadow Play ke alai iya (Tun Mahathir) madahka nya siti utai ke abru ti mandangka mesej penyerakup,” ku iya.