KUCHING: Opis Menteri Ai, Tanah enggau Pengeraja Asal (KATS) deka nempa kerejasama enggau perintah nengeri ngemansangka pemansut ai baruh tanah di Sarawak.
Menteri nya, Dr Xavier Jayakumar madahka opis menteri iya deka ngena penau tauka penemu dikena mantu Sarawak ngemansangka pemansut ai baruh tanah kelebih agi ba kandang menua ulu di nengeri tu.
“Kitai udah ngempa pemereti ati deka bekerejasama enggau Sarawak, iya nya ngena pengelandik ke dikemisi dikena ngemansangka ai baruh tanah di nengeri tu.
“Projek tu ila deka dipejalaika begulai enggau nengeri Sarawak kelebih agi ba kandang menua ulu nengeri tu,” ku iya ba aum pemberita pengudah penemuai meri basa ngagai Kepala Menteri Datuk Patinggi Abang Johari Tun Openg di Wisma Bapa Malaysia ditu, kemari.
Xavier madahka perambu nya udah dikenataika ngagai Abang Johari maya ke betemu urung sejam nya ke alai kepala menteri udah besetuju.
Nitihku iya, projek nya udah berengkah di Semenajung Malaysia ari baruh KATS lalu ungkup Sarawak aum nangkanka tu deka diatur dikena ngaluska perambu nya.
Taja pia ku iya, sebedau projek nya ulih dipejalaika di Sarawak, ‘4D’ patut dipejalaika dulu dikena ngulihka data ke pemadu baru pasal nengeri tu.
“Kitai deka ngereja ‘4D’ tu pengabis laun ba pun taun baru ila, pengudah bisi data tu, nya deka dikena ngemansangka industri tu ba kandang menua ulu Sarawak,” terang iya.
Xavier mega madahka KATS nengahOpis Nyukat enggau Ngaga Kar Malaysia (JUPEM) komited nyaga pengelikun garis entara menua.
Ungkup tuju nya ku iya, perintah besai ngungkupka RM4 juta setaun dikena nyukat garis entara darat antarabansa Malaysia di Sarawak enggau Brunei Darussalam.
Iya madah pekara ti dikemeratka iya nya mutarka empat kandang menua ke Bisi Penanggul Garis Entara Tetangguh (OBP) di Sarawak iya nya di D400, Gunung Raya, Gunung Jagoi enggau Batu Aum.
“Nengah penemuai basa tu, dikearapka kerejasama ti lebih tegap deka nyadi entara kededua piak,” ku iya.
Sama bisi ba aum pengarang berita nya, Sapit Menteri Ai, Tanah enggau Pengeraja Asal Tengku Zulpuri Shah Raja Puji sereta Ketuai Sekretari KATS Datuk Zurinah Pawanteh.