Anda di sini

Latih nyambil ba TVET deka disedia ungkup orang besai tuai: Kulasegaran

KUCHING: Opis Menteri Pengatur Pengereja Pengawa deka nyendiaka latih Pelajar Teknikal enggau Vokasional (TVET )nyambil ngagai bala orang besai tuai enggau orang bukai ti deka nyereta ba latih nya ari pukul 5:30 lemai ngagai 11 malam.

Menteri opis nya, M.Kulasegaran madahka perintah ngaku TVET nyadi siti kunchi aspirasyen dikena nyadi sebuah menua maju.

“Nya kebuah beguna amat ba kitai bisi pengereja pengawa ke dilatih sereta landik di Malaysia, ke alai maya diatu kitai semina bisi 30 peratus aja pengereja pengawa ke landik.

“Kitai meransang mayuh agi rayat Malaysia deka datai lalu nyereta latih TVET. Ungkup orang biak kita ulih nyereta program penuh jam lalu enggau sida ke enda ulih, tau ngambi latih nyambil, ke dibuka ari pukul 5.30 lemai ngagai 11 malam,” ku iya bejaku beserimbai ‘Program Bersama Pelanggan’ di Pasar Komuniti Stutong ditu, kemari.

Kulasegaran madah, graduet TVET bisi potensial bulih gawa enggau gaji ke besai dibanding graduet akademik ti udah nyata dipeda ba menua maju baka di Eropah enggau Singapura.

“Kitai mega ngansak kelebih agi apai indai ngambika meri sukung penuh ngagai bala anak sida ke deka ngambi bagi ba program TVET lalu ngikis runding negatif dalam bidang tu,” ku iya.

Bedau lama ke udah ku iya, Menteri Besai Tun Dr Mahathir Mohamad  madahka perintah ngaku TVET nyadi siti kunchi aspirasyen menua majak maju.

Nya kebuah ku iya,Malaysia patut ngembuan pengereja pengawa ke landik kediri empu lalu ngurangka bepanggai ba pekereja menua luar.

“Ari nya kitai ngarap ba taun 2020, kitai ulih nyapai 35 peratus pengereja pengawa ti landik,” ku iya.

Berebak enggau nya, sentang isu Gerempung Pengelikun Rama (PERKESO), Kulasegaran madah dikeandal gerempung nya bejalaika pangku pengawa ke lebih manah nengah nampingka diri enggau rayat di menua tu.

Ku iya Perkeso, bejalaika pangku pengawa nya beguna amat nyadi ‘safety net’ ngagai raban B40.

“Bedau lama udah, kami udah ngaga perambu baru ngagai Opis Menteri Pekara Wang (MoF) lalu kami arap opis menteri nya ulih berunding ngambika Perkeso mungkur bala pekebun, orang berikan enggau ngagai sida ke enda diintu gerempung.

“Juluk aku, semua pengereja pengawa di menua tu dijaga Perkeso baka menua maju ke bukai ti ulih dipeda kitai 100 peratus pengereja pengawa iya dilindung insuran ti disedia perintah sida,” ku iya.

Sama bisi datai program nya kemari, Sapit Menteri nya, Datuk Mahfuz Omar, Ketuai Sekretari Opis Menteri, Datuk Amir Omar enggau Direktor Perkeso Nengeri, Philip Sangkan.