SIBU: Program meri darah ke diatur Kelab KTS Sibu beserimbai enggau Hari Malaysia ba Star Mega Mall nerima sambut ke manah ari mensia mayuh, kemari.
Maya nya, urung 100 iku datai nyaup ngemujurka program meri darah nya.
“Program tu siti ari pengawa rama (CSR) kami ti diatur niting taun beserimbai enggau Hari Malaysia.
“Ari program tu kami mega mai mensia mayuh nemu pemesai reti pengawa meri darah ti beguna amat ngagai orang ti begunaka nya,” pia ku iya chaiman gerempung nya, Benny Lau.
Ku iya, program nya udah diatur sida dalam kandang lapan taun ke udah nyentuk ke diatu.
Nambahka nya, Benny mega madah, sida udah mantaika program nya ba media rama enggau chelak ngambika mensia mayuh bela nemu lalu datai ngemujurka agi program.
“Kelimpah ari nya, kami mega udah ngatur semaya enggau Bank Darah Sibu deka ngaduka program tu baru ba hari ke sama taun ti deka datai,” ku iya madah.
Dulu agi ari nya, sida bisi nyuaka setipikit ngagai Shell Timur Sdn Bhd enggau Star Mega Mall sereta pengari ari Bank Darah Sibu ti bela besaup ngemujurka program sehari nya.
Sama bela datai iya nya presiden enggau mandal chairman Kelab KTS Sibu iya nya Kevin Lau enggau Michael Ting.