Anda di sini

Polisi ekonomi menua deka diserenih baru

 Azmin (duduk tengah) begambar enggau ketuai sereta raban PKR ke datai ngulu  Pengerami Bejadi ‘Perdana MATC’ Nengeri Sarawak di Kuching ensana. — Gambar Muhammad Rais Sanusi
KETUAI PKR: Azmin (duduk tengah) begambar enggau ketuai sereta raban PKR ke datai ngulu Pengerami Bejadi ‘Perdana MATC’ Nengeri Sarawak di Kuching ensana. — Gambar Muhammad Rais Sanusi

KUCHING: Polisi ekonomi menua deka diserenih baru dikena ngaga ubah ngambika nya lebih inklusif.

Menteri Pekara Ekonomi, Datuk Seri Azmin Ali madah, pengawa mansik baru polisi ekonomi nya dikena ngerapitka agi seraka entara mengeri enggau menua pesisir sereta entara orang ke kaya enggau ke seranta.

“Menteri Besai Tun Dr Mahathir Mohammad udah minta aku ngenataika siti keretas dalam kabinet Hari Enam tu tadi dikena kitai meda baru polisi ekonomi menua.

“Kami udah berandau pengelama tiga jam enggau Menteri Besai sereta kabinet setuju enggau kereta ke dibantaika aku ti betajuk ‘Shared Prosperity’.

“Reti nya kitai bekunsi pengaya enggau semua rayat dalam Malaysia,” ku iya lebuh bejaku maya Pengerami Bejadi ‘Perdana Mesyuarat Agung Tahunan Cabang (MTAC)’ Parti Keadilan Rakyat (PKR) Nengeri Sarawak 2019 ensana.

Pengerami nya diatur ba sebuah hotel tebilang ditu lalu bisi digulu beberapa iku ketuai PKR perintah besai enggau nengeri ke bukai.

Tambah Azmin, kelimpah polisi ekonomi ke lebih inklusif iya mega deka nentuka agih belanja pemansang ungkup Sarawak deka besai agi dibanding ke udah diasai sebedau tu.

Berebak enggau nya ku iya, Menteri Besai udah mayuh nyadi ketuai aum Sempekat Malaysia 1963 (MA63) ti mungkur kededua Kepala Menteri Sarawak enggau Sabah.

Ari pemayuh pekara ti udah betindih nyadi ku iya, mayuh pekara udah diputarka lalu ke bukai agi nya deka dipadah dalam timpuh ke diatu.

Ba pengerami nya, Azmin ke mega Sapit Presiden PKR ngelalau raban parti pulai baru ngagai pengawa asal parti lalu ukai nya pengawa dipejalaika kediri.

Ku iya, pemujur PKR enggau PH dalam merintah perintah besai ukai pekara ke mudah tang iya enggai utai ke dijapai diatu dirusak sida ke baru dalam parti.

“Lebuh kitai menang anang ngeruntuhka pengawa ke udah digaga kitai pengelama 20 taun tu. Aku ngasai pekara tu meseti dibetulka lalu pengelurus meseti pulai baru ngagai pengawa asal iya,” ku iya.