Anda di sini

PH enda dikemendar nyiri ketuai raban di nengeri tu

JAMES MASING
JAMES MASING

KUCHING: Sarawak enda ngemendar tauka setuju enggau Perintah Pakatan Harapan (PH) nyiri kediri ketuai raban di nengeri tu.

Sapit Kepala Menteri, Tan Sri James Masing madahka PH ngena pekara ketuai raban mambarka perintah rayat Sarawak.

Ku iya, prosedur standard ba pengawa nyiri ketuai raban bansa di nengeri tu udah dikemeran betaun pengelama.

Dalam kes komuniti Iban ku iya, Tuai Rumah dipilih nembiak resak sida sebedau orang ke dipilih nya disahka perintah.

Sama mega dalam hal komuniti Orang Ulu, tang pengawa milih ketuai raban bansa sida nitihka atur sida empu ari sukut struktur sosial.

“Tu prosedur standard ba pengawa milih ketuai raban bansa ke udah dikemeranka betaun-taun.

“Pengawa  perintah PH tu semina mandangka pemeli sida sentang struktur sosial enggau budaya rayat di Sarawak.

“Kitai enda ngemendar tauka setuju enggau perintah Pakatan Harapan ti deka ke bisi dua iku Tuai Rumah dikena ngiring sebuah rumah panjai,” ku Masing nengah  penerang iya kemari.

Masing ke mega Presiden Parti Rakyat Sarawak (PRS) bejaku munyi nya lebuh ke nimbal penerang Sapit Menteri Pemansang Menua Pesisir, Sivarasa Rasiah bekaul enggau pengawa nyiri ketuai raban bansa.

Sivarasa lebuh bejaku ba Pengerami ‘Perdana Mesyuarat Agung Tahunan Cabang (MATC)’ Parti Keadilan Rakyat (PKR) Nengeri Sarawak kena malam Hari Minggu nyin  tadi madahka PH deka kediri empu nyiri ketuai raban  bansa di Sarawak.

Ku Sivarasa, perintah besai mega deka ngubah Komiti Pengatur Komuniti Genturung Pendiau (MPKK)ba empat nengeri baka Kelantan, Pahang, Terengganu enggau Perlis nyengkaum Sarawak.