Anda di sini

Perintah seruran deka mantu perintah besai ngaga projek ke rayat

SHARIFAH HASIDAH
SHARIFAH HASIDAH

KUCHING: Gabungan Parti Sarawak (GPS) seruran bekerja sama sereta deka mantu perintah besai enti sekeda projek ti dipejalaika nya deka meri pemaik ngagai rayat.

Menteri Muda ba Opis Kepala Menteri (Undang-undang, Kaul Nengeri enggau Perintah Besai Sereta Matau Projek) Sharifah Hasidah Sayeed Aman Ghazali madah di Sarawak, perintah nengeri ari baruh GPS tenda kelalu bermain politik sereta besemaya puang.

Ku iya, udah tentu perintah GPS enggai mantu enti Perintah Besai ari baruh Pakatan Harapan (PH), nyema sida datai ke Sarawak kitu lalu mai budaya politik ti enda manah ti ngujungka enda likun, mambarka penyerakup lalu pupu bansa rayat Sarawak ti bebida jalai pengerapa bela enda pechatya ke pangan diri agi.

“Nadai pengamat perintah GPS enda mantu sereta ngenusahka perintah besai ngaga sekeda projek di Sarawak.

“Ulih kita madah bakani kami (kerajaan GPS) ngenusahka pengawa ngaga sekeda projek di Sarawak?

“Sesapa aja tau nempa sebarang utai ti dekedaka ke sida ti nadai fakta tauka pengamat,” ku iya nengah penerang berita kemari.

Iya bejaku munyi nya ngenang berita ti dipansutka Beliau The Borneo Post kemari ti madahka Mandal Presiden Parti Keadilan Rakyat (PKR) Ali Biju bejaku madahka GPS enda mantu sereta ngenusah perintah besai ngaga sekeda projek pemansang di nengeri tu.

Kaban Parlimen Saratok nya mega diripot madahka diri asa ati lebuh ke nemu GPS nagang bala ketuai raban bansa menua tu ngulu barang bagi pengerami enggau program ke diatur PH.

Iya mansutka penemu nya lebuh ke bejaku ba Pengerami Bejadi Aum Besai Ninting Taun Pampang PKR Nengeri Sarawak di sebuah hotel ditu kena malam Hari Minggu nyin tadi.

Ngenang baru sentang penerang Ali nya, Sharifah Hasidah madah ke bendar perintah PH udah nginsil sekeda projek sereta nguji nangguh ngawa ngaga sekeda projek di nengeri tu.

Ku iya, sekeda Projek ti udah dikemendarka sebedau tu, baka nya mega tinda udah dibuka mengkang besau tembu sereta kelalu lubah dipejalaika, ambika chunto baka Projek Bekal Ai ke rumah-rumah ti dikemendarka ari Atur Pemansang Malaysia Lumpar ke-11 ke alai ungkup belanja ari perintah besai lalu bedau diberi.

Letegal nya ku iya, Perintah Nengeri ari baruh GPS udah ngemendarka RM2.8 bilion dikena nentuka sekeda projek bekal ai di nengeri ti pejalaika enggau manah.  

“Perintah GPS fokus deka mai Projek Pemansang ngagai rayat lalu kami sanggup bekerejasama sereta mantu Perintah Besai ngaga sebarang aja projek ungkup rayat.

“Fokus lalu pekara ti dikemeratka kami iya pengelantang rayat,” ku iya.